سردار یوسف ،راغب نعیمی ملاقات، نظام زکوٰۃ ،صلوٰۃ پرگفتگو

اسلام آباد :وفاقی وزیر مذہبی امور سردار محمد یوسف نے چیئرمین اسلامی نظریاتی کونسل علامہ ڈاکٹر راغب حسین نعیمی سے ملاقات کی، جس میں نظام زکوٰۃ اور نظام صلوٰۃ پر تبادلہ خیال کیا گیا ۔وفاقی وزیر نے نظام زکوٰۃ پر کونسل کی معاونت مانگی ۔ چیئرمین نے کہا اس پر مذہبی امور اور اسلامی نظریاتی کونسل کے محققین پر مشتمل ورکنگ گروپ تشکیل دیا جائے ۔سردار یوسف نے کہا رویت ہلال کمیٹی سے متعلق بھی امور قابل غور ہیں اور اس کو مزید فعال بنانے کی ضرورت ہے ۔ چیئرمین نے رویت ہلال کمیٹی پر قومی اسمبلی سے قانون سازی کو انتہائی ضروری قرار دیا اور اس کے دائرہ کار کو ڈویژنل سطح تک بڑھانے کے بارے میں رائے دی۔ ڈاکٹر راغب نعیمی نے اس ضمن میں ہر طرح کے علمی تعاون کی یقین دہانی کروائی ۔