بلوچستان میں حالیہ بارشوں سے ہونیوالے نقصانات کی رپورٹ جاری

کوئٹہ: بلوچستان میں حالیہ بارشوں کے دوران ہونے والے نقصانات سے متعلق پی ڈی ایم اے نے رپورٹ جاری کر دی۔رپورٹ کے مطابق بلوچستان میں 24 مارچ سے اب تک موسلادھار بارشوں کے دوران مختلف واقعات میں 6 افراد جاں بحق ہوئے، جاں بحق ہونے والوں میں 2 بچے بھی شامل ہیں۔پی ڈی ایم اے کے مطابق حالیہ بارشوں کے دوران گھروں کی چھتیں گرنے سے 4 افراد زخمی بھی ہوئے، موسلادھار بارشوں کے باعث 22 گھروں کو نقصان پہنچا ہے۔رپورٹ کے مطابق سیلاب کے باعث نقصانات ہرنائی، کوہلو، تربت، جعفر آباد، پشین اور قلعہ عبداللہ میں رپورٹ ہوئے۔پی ڈی ایم اے کے مطابق حالیہ بارشوں اور ژالہ باری سے پشین اور قلعہ سیف اللہ میں کھڑی فصلوں کو بھی نقصان پہنچا ہے۔رپورٹ کے مطابق سیلابی صورتحال کے باعث ہونے والے نقصانات کا تخمینہ لگانے کا عمل جاری ہے، متاثرہ علاقوں میں امدادی سامان کی فراہمی کا عمل جاری ہے۔