Category: تعلیم

علامہ اقبال اوپن یونیورسٹی میں ارلی چائلڈ ہُڈ ڈیولپمنٹ کانفرنس ،دنیا بھر کے مندوب شریک
اسلام آباد:وفاقی وزیر برائے تعلیم و تربیت ڈاکٹر خالد مقبول صدیقی نے کہا ہے کہ بچوں کی ابتدائی تعلیم و تربیت قومی ترقی کی اساس ہے ۔ ابتدائی عمر میں معیاری تعلیم اور مثبت تربیت بچوں کی شخصیت سازی، ذہنی نشوونما اور مستقبل کی کامیابی میں بنیادی کردار ادا کرتی ہے ۔ اس شعبے میں کی جانے والی سرمایہ کاری درحقیقت ایک مضبوط اور خوشحال مستقبل کی ضمانت ہے جس کے مثبت اثرات طویل مدت تک نمایاں رہتے ہیں۔وہ علامہ اقبال اوپن یونیورسٹی میں///ارلی چائلڈ ہُڈ ڈیولپمنٹ/// کے موضوع پر منعقدہ پانچویں بین الاقوامی کانفرنس کی اختتامی تقریب سے خطاب کر رہے تھے ۔اس موقع پر ایچ ای سی کے چیئرمین ڈاکٹر نیاز نے کہا کہ بچوں کی ابتدائی تعلیم ان کی زندگی کی بنیاد ہوتی ہے اور اس بنیاد کو جتنا مضبوط اور معیاری بنایا جائے گا، بچے اتنے ہی اعتماد کے ساتھ اگلے تعلیمی مراحل میں کامیابی حاصل کریں گے ۔ کانفرنس میں ملکی و غیر ملکی ماہرین تعلیم، محققین اور پالیسی سازوں نے شرکت کی اور بچوں کی ابتدائی تعلیم کو درپیش چیلنجز اور ان کے حل پر تفصیلی تبادلہ خیال کیا۔مقررین نے اس بات پر اتفاق کیا کہ پاکستان میں ابتدائی تعلیم کے شعبے کو مزید توجہ دینے کی ضرورت ہے ، خصوصاً دیہی اور پسماندہ علاقوں میں سہولیات کی فراہمی کو یقینی بنایا جائے ۔ اس موقع پر جدید تدریسی طریقوں، اساتذہ کی تربیت، اور والدین کی شمولیت کو بھی اہم قرار دیا گیا۔

اسلام آباد : علامہ اقبال اوپن یونیورسٹی میں سیرت النبیؐ کے موضوع پر فکری نشست کا انعقاد کیا گیا۔ شعبہ سیرت سٹڈیز کے چیئرمین ڈاکٹر شاہ معین الدین ہاشمی نے اظہارِ خیال کرتے ہوئے کہا کہ اسلام کو صحیح معنوں میں سمجھنے، اللہ کی ذات و صفات کی معرفت حاصل کرنے اور قرآنِ مجید کے حقیقی پیغام تک رسائی کے لیے سیرتِ طیبہؐ کا مطالعہ ناگزیر ہے ۔ حضورؐ کی حیاتِ مبارکہ قرآنِ کریم کی عملی تفسیر ہے جس کے بغیر دینِ اسلام کی مکمل اور درست تفہیم ممکن نہیں۔

نیوٹیک نے ساٹھ ہزار کی منظوری کے باوجود بہترانتظام سے 72 ہزار کو تربیت دی ذیلی کمیٹی نے مختلف اداروں کیخلاف کارروائیوں،بجٹ کی تفصیل طلب کرلی
اسلام آباد: سینیٹ کی ذیلی قائمہ کمیٹی برائے تعلیم و تربیت کا اجلاس سینیٹر کامران مرتضیٰ کی زیر صدارت منعقد ہوا جس میں نیوٹیک کی مجموعی کارکردگی اور جاری پروگراموں کا تفصیلی جائزہ لیا گیا۔اجلاس کے دوران ایگزیکٹو ڈائریکٹر نیوٹیک عامر جان نے گزشتہ پانچ برسوں کی کارکردگی پر بریفنگ دیتے ہوئے بتایا کہ مدارس کے طلبہ کو دس ہزار روپے ماہانہ وظیفہ دیا جا رہا ہے جبکہ سالانہ دو ہزار طلبہ کو مدارس میں فنی تربیت فراہم کی جاتی ہے ۔ایگزیکٹو ڈائریکٹر کے مطابق نیوٹیک کا نیا پروگرام صوبہ سندھ میں بھی شروع کر دیا گیا ہے ۔ انہوں نے بتایا کہ اگرچہ 60 ہزار ٹریننگز کی منظوری دی گئی تھی تاہم بہتر انتظامی حکمت عملی کے باعث 72 ہزار بچوں کو تربیت فراہم کی گئی۔ کمیٹی کے ایک رکن نے اجازت سے زائد ٹریننگز کے انعقاد پر سوال اٹھاتے ہوئے وضاحت طلب کی۔عامر جان نے بتایا کہ وزیر اعظم کی جانب سے تین لاکھ ٹریننگز کا ہدف مقرر کیا گیا ہے ، جبکہ رواں سال ساڑھے تین لاکھ سے زائد بچوں نے تربیت کے لیے درخواستیں جمع کرائیں۔ انہوں نے واضح کیا کہ نیوٹیک کا براہِ راست کردار ملازمت فراہم کرنا نہیں بلکہ تربیت کی تکمیل اور تصدیق تک محدود ہے ۔ 2024 میں مکمل ہونے والی ٹریننگز کے نتیجے میں 53 فیصد امیدواروں نے ملازمت حاصل کی۔اجلاس میں کنوینر کمیٹی نے 2011 سے اب تک مختلف اداروں کے خلاف کی گئی کارروائیوں، نشستوں کی تقسیم اور بجٹ کی تفصیلات طلب کر لیں۔ ایگزیکٹو ڈائریکٹر نیوٹیک نے بتایا کہ ادارے کا آٹھ ارب روپے مالیت کا منصوبہ 2027 تک جاری رہے گا۔

صوبے پسماندہ اضلاع کو ترجیح دیں،احسن اقبال کاسٹیئرنگ کمیٹی اجلاس سے خطاب

اسلام آباد :وفاقی وزیر برائے منصوبہ بندی، ترقی و خصوصی اقدامات احسن اقبال کی زیر صدارت سماجی و سیاسی دائرہ کار پر ایپکس کمیٹی کی قائم اسٹیئرنگ کمیٹی کا نواں اجلاس ہواجس میں اہم فیصلہ کیا گیا کہ تعلیمی اداروں کی رجسٹریشن کے لیے یکساں قانون سازی کی جائے ۔ احسن اقبال نے کہا کہ کسی بھی قسم کے تعلیمی ادارے خواہ وہ پرائیویٹ سکول ہوں، مدارس ہوں یا سرکاری تعلیمی ادارے ، سب کے لیے ایک یونیورسل قانون ہونا چاہئے تاکہ کسی کو امتیازی سلوک کا شکار ہونے کا احساس نہ ہو۔انہوں نے کہا کہ مدارس بھی تعلیمی ادارے ہیں انھیں ایک علیحدہ حیثیت میں رکھنے کی وجہ سے ان میں شکوک و شبہات پیدا ہوتے ہیں۔ انہیں شمولیت کا حصہ بناتے ہوئے قومی دھارے میں شامل کرنا ہے ۔ وفاقی وزیر کی ہدایت پر ڈائریکٹوریٹ آف ریلیجس ایجوکیشن وفاقی اور صوبائی سطح پر مدارس، سکولز اور تکنیکی اداروں کے رجسٹریشن کے لیے ایک مشترکہ فریم ورک تیار کرے گا۔ وفاقی وزیر نے ہدایت کی کہ وفاق المدارس کے نمائندگان کا اجلاس بلایا جائے تاکہ اڑان پاکستان کے ترقیاتی ایجنڈے میں مدارس کو شامل کیا جائے ۔ احسن اقبال نے کہا کہ وفاق صوبوں کو ترقیاتی فنڈز فراہم کر رہا ہے ، اب صوبوں کی بھی ذمہ داری ہے کہ وہ پسماندہ اضلاع کو اولین ترجیح دیں ۔

اسلام آباد:ملک بھر میں شب معراج آج انتہائی مذہبی عقیدت واحترام کیساتھ منائی جائے گی۔ مساجد میں خصوصی محافل نعت اور عبادات کا اہتمام کیا جائیگا۔ شب معراج النبیؐ کے سلسلے میں اجتماعات میں علمائے کرام اور مقررین واقعہ معراج اور اس کی فضیلت پر روشنی ڈالیں گے۔ اس موقع پر ملک وقوم کی ترقی وسلامتی اورعالم اسلام کی سلامتی وخوشحالی کیلئے خصوصی دعائیں مانگی جائیں گی ۔ملک بھر میں مساجد کو انتہائی خوبصورتی سے سجا دیا گیا۔

کراچی: صوبہ سندھ میں سردی کے باعث سکولوں کے اوقات کار میں تبدیل کر دی گئی۔وزیر تعلیم سید سردار علی شاہ نے وزیر اعلیٰ سندھ سید مراد علی شاہ سے مشاورت کے بعد فیصلہ کیا۔فیصلے کے مطابق صوبہ بھر کے تمام سرکاری و نجی سکول 2 ہفتوں کے لیے صبح 9 بجے کھولے جائیں گے۔سکول بند ہونے کا ٹائم ٹیبل پہلے کی طرح معمول کے مطابق رہے گا، فیصلے کا اطلاق 26 جنوری تک رہے گا جس کا نوٹیفکیشن جاری کر دیا گیا ہے۔

لاہور:ہائر ایجوکیشن کمیشن پاکستان نے ملک بھر کی جامعات کے تعلیمی، انتظامی اور مالیاتی نظام کو جدید خطوط پر استوار کرنے کیلئے ایک جامع آٹومیشن سسٹم ‘‘مکتب’’کا باقاعدہ آغاز کر دیا ۔ یہ فلیگ شپ ڈیجیٹل ٹرانسفارمیشن پروگرام اعلیٰ تعلیمی اداروں میں شفافیت، کارکردگی اور مو ثر فیصلہ سازی کو فروغ دینے کیلئے متعارف کرایا گیا ہے ۔ ایچ ای سی حکام کے مطابق ‘‘مکتب’’ایک جدید اور مربوط آٹومیشن سسٹم ہے ، جس میں انٹرپرائز ریسورس پلاننگ، اسٹوڈنٹ لائف سائیکل مینجمنٹ اور بلیک بورڈ لرننگ مینجمنٹ سسٹم شامل ہیں۔ اس نظام کے ذریعے جامعات کے تعلیمی اور انتظامی معاملات کو ڈیجیٹل پلیٹ فارم پر یکجا کیا گیا ہے ۔ذرائع کے مطابق یہ منصوبہ عالمی بینک کے مالی تعاون سے چلنے والے ہائر ایجوکیشن ڈویلپمنٹ اِن پاکستان پروجیکٹ کے تحت فنڈ کیا گیا ہے ۔ پہلے مرحلے میں ‘‘مکتب’’کو ملک کی 25 سرکاری یونیورسٹیوں میں نصب کر دیا گیا ہے ۔ایچ ای سی کا کہنا ہے کہ اس منصوبے سے یونیورسٹیوں کی مجموعی کارکردگی میں بہتری آئے گی۔