(سنگ میل نیوز ) لاہور سمیت پنجاب کے تعلیمی بورڈ ز نےنہم جماعت کے نتائج کا اعلان کردیا۔
کنٹرولر امتحانات زاہد میاں اور سیکرٹری بورڈ بشریٰ بی بی نے نتائج کا اعلان کیا،
اُمیدوار لاہور بورڈ کی ویب سائٹ سے آن لائن نتائج معلوم کر سکتے ہیں۔
نہم جماعت کےامتحان میں2لاکھ87ہزاراُمیدواروں نےحصہ لیا تھا جن میں ایک لاکھ27ہزار836امیدوارکامیاب ہوئے۔
امتحان میں کامیابی کاتناسب 44.5فیصدرہا جبکہ امتحان میں1لاکھ59ہزاربچےفیل ہوئےہیں۔
واضح رہے کہ گزشتہ سال سے 13 دن پہلے نتائج کا اعلان کیا گیا ہے۔
اسلام آباد: (سنگ میل نیوز)وفاقی سرکاری تعلیمی اداروں میں موسم گرما کی چھٹیوں کے بعد تعلیمی سرگرمیاں شروع ہوگئیں۔
حکام کے مطابق وزارت تعلیم نے یکم سے 4 اگست تک چھٹیوں میں توسیع دی تھی۔ تعلیمی اداروں کے لیے نئے ٹائمنگز بھی لاگو کر دی گئیں۔ ایوننگ شفٹ والے تعلیمی ادارے آٹھ سے ڈیڑھ بجے تک کھلیں گے جبکہ
سنگل شفٹ والے تعلیمی ادارے 8 سے دوپہر 2 بجے تک کھلیں گے۔ پی ایم میل پروگرام کے تحت پرائمری کلاسز کے 220 اسکولز میں دوپہر کامفت کھانا بھی دیا جائے گا۔
کراچی: نیوکراچی میں ڈاکوؤں نے ایک شہری سے دو لاکھ روپے چھین لیے اور مزاحمت پر ہوائی فائرنگ کردی جس کے سبب مسجد کی چھت پر کھڑا نمازی جاں بحق ہوگیا۔
ایس پی نیو کراچی فیصل نور کے مطابق علی محمد گوٹھ گلزار مسجد کے باہر موٹر سائیکل سوار 2 ملزمان نے ایک شہری سے 2 لاکھ روپے چھین لیے، شہری نے مزاحمت کی تو ملزمان نے فرار ہونے کے لیے ہوائی فائرنگ کردی۔
فائرنگ کے باعث گلزار مسجد کی چھت پر کھڑا 30 سالہ نمازی نذیر احمد گردن میں ایک گولی لگنے سے زخمی ہوگیا۔ ملزمان موقع سے فرار ہوگئے۔ زخمی کو فوری طور پر اسپتال منتقل کیا جارہا تھا کہ اس نے راستے میں دم توڑ دیا، پولیس نے قانونی کارروائی کرنے بعد لاش ورثا کے حوالے کردی۔
ایس پی کے مطابق مقتول کی دو ماہ قبل شادی ہوئی تھی اور گدھا گاڑی چلاتا تھا، مقتول نیو کراچی کا ہی رہائشی تھا، پولیس جائے وقوع اور اس کے اطراف کی سی سی فوٹیج جمع کرنے کی کوشش کررہی ہے۔
ایس پی نے مزید بتایا کہ دونوں ملزمان شلوار قمیص میں ملبوس تھے اور ان کی عمر تقریبا 20 سے 25 سال کے دوران معلوم ہوتی ہے۔
واضح رہے کہ شہر میں ڈکیتی و رہزنی کی وارداتیں عروج پر پہنچ گئی ہیں اور پولیس کی تمام ترحکمت عملی ناکام نظر آتی ہے۔
( سنگ میل نیوز )وفاقی حکومت نے16 اور 17 جولائی کو عام تعطیل کرنے کا اعلان کردیا ۔
وزیر اعظم شہباز شریف نے نویں اور دسویں محرم کے باعث چھٹیوں کی منظوری دی ،وزیراعظم کی منظوری کے بعد کابینہ ڈویژن نےنوٹیفکیشن جاری کردیا۔
کنٹرولربورڈ کےمطابق 2 لاکھ 50 ہزار سےزائد طلبا امتحانات میں شریک ہوئے ، 1 لاکھ 74 ہزارطلبا میٹرک امتحانات میں پاس ہوئے،میٹرک امتحانات میں کامیابی کا تناسب 69.75 فیصد رہا،سائنس گروپ میں 73.91 فیصد طلبا پاس ہوئے،آرٹس گروپ میں 55 فیصد طلبا پاس ہوئے،267 نقل کےکیسز، 60 سےزائد ایف آئی آر درج ہوئیں۔
سائنس گروپ میں 80 فیصد لڑکیاں، 67 فیصد لڑکےپاس ہوئے،آرٹس گروپ میں 63 فیصد لڑکیاں، 38 فیصد لڑکے کامیاب ہوئے۔ چیئرمین لاہور بورڈ زید بن مقصود نے کہا ہے کہ میٹرک امتحانات میں پہلی پوزیشن آیان کاشف نے حاصل کی، پہلی پوزیشن حاصل کرنے والے طالب علم کا تعلق دانش سکول سے ہے،میٹرک امتحانات میں پوزیشن لینے والے طلبہ کے اعزاز میں تقریب بھی منعقد کی گئی،
صوبائی وزیر تعلیم رانا سکندر حیات نے پوزیشن ہولڈرز کو میڈل پہنائے اور تعریفی سرٹیفکیٹس تقسیم کیے۔ اس موقع پر گفتگو کرتے ہوئے صوبائی وزیر تعلیم رانا سکندر حیات کا کہنا تھا کہ ٹاپ پوزیشن ہولڈر نے محمد آیان نے 1200 میں سے 1190 نمبر حاصل کیے، طلبہ کو اچھے انداز میں تعلیم دینے والے اساتذہ کو سلام پیش کرتا ہوں، بچوں کیلئے جو کچھ ہو سکا کریں گے۔
لاہور، فیصل آباد، ملتان اور بہاولپور کے تعلیمی بورڈ نے میٹرک پوزیشن ہولڈرز کے ناموں کا اعلان کر دیا۔ میٹرک میں مجموعی طور پر ڈویژنل پبلک سکول فیصل آباد کی عروج فاطمہ نے 1189 نمبرز کے ساتھ پہلی پوزیشن حاصل کی، گورنمنٹ ہائی سکول 239 رب کے محمد فائق اور ڈی پی ایس ٹوبہ ٹیک سنگھ کے علی احمد نے 1187 نمبروں کے ساتھ مجموعی طور پر دوسری پوزیشن حاصل کی،
دی ایجوکیٹرز پولیس پبلک سکول فیصل آباد کے معظم طفیل نے 1186 نمبروں کے ساتھ مجموعی طور پر تیسری پوزیشن حاصل کی۔ لاہور بورڈ کے مطابق دانش سکول سے محمد آیان کاشف 1190نمبر لے کر پہلے نمبر پر رہے، ماہین سجاد 1186 نمبر لے کر دوسرے نمبر پر رہی جبکہ عبیرہ اصغر, عبیداللہ عثمان، زینب آصف اور سحر شکیل 1185 نمبر لے کر تیسرے نمبر پر رہیں، پہلی 2 پوزیشنز سرکاری سکول کے بچے لے گئے،
ٹاپ پوزیشن پر رواں سال لڑکے بازی لے گئے۔ آرٹس گروپ بوائز میں غلام محی الدین 1073 نمبر لے کر پہلے ، اہتشام الحق 1071 نمبر لے کر دوسرے اور محمد فرحان 1061 نمبر لے کر تیسرے نمبر پر رہے۔ آرٹس گروپ گرلز میں حفصہ اور مائرہ عمران 1152 نمبروں کے ساتھ پہلی، حافظہ کائنات عامر 1147 نمبروں کے ساتھ دوسری اور مائرہ خرم 1137 نمبروں کے ساتھ تیسری پوزیشن حاصل کی۔
تعلیمی بورڈ ملتان کا میٹرک سالانہ امتحانات 2024 کے پوزیشن ہولڈرز کا اعلان کیا، ملتان بورڈ میں مجموعی طور پر پہلی پوزیشن انس نوید کی ہے انہوں نے 1191 نمبر حاصل کۓ، محمد فیضان شوکت نے 1190 نمبروں کے ساتھ دوسری پوزیشن جبکہ بورے والہ سے رانیہ شاہد نے 1188 نمبر لیکر تیسری پوزیشن حاصل کی ہے۔
بہاولپور بہاولنگر سے تعلق رکھنے والے سٹی گرائمر ہائی سکول کے طالبِ علم عکاشہ طارق نے 1193 نمبرز لیکر مجموعی طور پر پہلی پوزیشن حاصل کی، بہاولپور گورنمنٹ گرلز ہائی سکول سیٹلائٹ ٹاؤن کی طالبہ منعم شاہد نے بورڈ میں 1190 نمبرز لیکر دوسری پوزیشن حاصل کی، رحیم یار خان کے محمد وقار اور خانپور کے علی حیدر طالب علموں نے بورڈ میں تیسری پوزیشن 1187 نمبرز لیکر حاصل کی۔
سائنس گروپ میں بہاولنگر کے عکاشہ طارق نے 1193 نمبرز لیکر پہلی پوزیشن حاصل کی، محمد وقار اور علی حیدر نے سائنس گروپ میں بھی اکٹھے 1187 نمبرز لیکر دوسری پوزیشن حاصل کی، رحیم یار خان کے زین الرحمن نے 1183 نمبر لیکر سائنس گروپ میں تیسری پوزیشن حاصل کی۔ آرٹس اور ہومینیٹی گروپ میں منچن آباد کے عبدالروف نے 1056نمبرز لیکر طالبعلموں میں پہلی پوزیشن حاصل کی، فورٹ عباس کی ماریہ رفیق نے 1120 نمبرز لیکر طالبات میں پہلی پوزیشن حاصل کی۔
کراچی: اسلامیہ کالج کی منتقلی ناکامی کا شکار ہوگئی، آرٹس اینڈ کامرس کالج میں طلبہ اور عملے کے لیے فرنیچر نہیں جب کہ سائنس کالج کی 15 تجربہ گاہیں نئی عمارت کی 4 لیبس میں منتقل ہوگئی لیکن لائبریری اور میوزیم پرانی عمارت میں ہی رہ گئے۔
کراچی کے معروف سرکاری تعلیمی ادارے گورنمنٹ اسلامیہ کالج (سائنس/کامرس اینڈ آرٹس) مارننگ/ایوننگ کی منتقلی کا منصوبہ ناکامی سے دوچار ہوگیا ہے، محکمہ کالج ایجوکیشن کی غفلت و لاپرواہی کے سبب یہ دونوں کالج تباہی کے دہانے پر آکھڑے ہوئے ہیں۔
مزار قائد کے نزدیک گرومندر کے علاقے میں برسہا برس سے قائم اسلامیہ کالج کمپلیکس سیل (سربمہر) کردیا گیا ہے جب کہ محکمانہ غفلت کے سبب گورنمنٹ اسلامیہ آرٹس اینڈ کامرس کالج کا تمام فرنیچر، دفتری ریکارڈ، لائبریری اور اسلامیہ سائنس کالج کا 70 فیصد ساز وسامان وہی رہ گیا ہے، جس کے بعد دونوں کالجوں کی نئی عمارتوں میں رکھنے کو کچھ بھی نہیں ہے جس کے باعث ہزاروں طلبہ کا مستقبل ڈاؤ پر لگ گیا ہے۔
نارتھ کراچی میں منتقل کیے گئے گورنمنٹ اسلامیہ آرٹس اینڈ کامرس کالج کی نئی عمارت خالی پڑی ہے اور عملہ زمین پر بیٹھنے پر مجبور ہے جب کہ اسلامیہ سائنس کالج کا محض 30 فیصد سامان نئی عمارت میں منتقل ہو پایا ہے باقی تمام سامان اسلامیہ کالج کمپلیکس کی پرانی عمارت میں ہی سیل ہوگیا۔
دوسری جانب اسلامیہ سائنس کالج کو نارتھ کراچی کے دور دراز علاقے میں جو نئی عمارت دی گئی ہے اس کا رقبہ گزشتہ عمارت کے مقابلے میں 70 فیصد سے بھی کم ہے جس کے سبب اس نئی عمارت میں سائنس کالج چلانا محال ہوگیا ہے۔
رپورٹ کے مطابق بعض سائنسی مضامین کی تجربہ گاہیں بند ہوگئی ہیں اور بعض تجربہ گاہوں کو ایک ہی لیب میں منتقل کردیا گیا ہے۔
اس سلسلے میں “ایکسپریس ” کو گورنمنٹ اسلامیہ آرٹس اینڈ کامرس کالج کے تدریسی و غیر تدریسی عملے نے بتایا کہ پہلے تو محکمہ کالج ایجوکیشن نے ہمیں کسی تحریری حکم نامے کے بجائے زبانی احکامات دیتے ہوئے کالج منتقل کرادیا جب کہ منتقلی پر آنے والے اخراجات بھی کالج کو نہیں دیے اور کہا کہ یہ اخراجات کالج انتظامیہ خود برداشت کرے۔
ابھی یہ بحث جاری ہی تھی کہ اسی اثناء میں اسلامیہ کالج کمپلیکس سیل کردیا گیا اور ہمارا بیشتر دفتری سامان، آفس کمپیوٹرز اور تدریس و غیر تدریسی استعمال کا فرنیچر وہیں رہ گیا جس میں طلبہ کے انرولمنٹ فارم بھی شامل ہیں جو انٹر بورڈ کو پورٹل کے ذریعے بھجوانے ہیں جب کہ پرانے طلبہ کا ریکارڈ بھی اسی میں شامل ہے۔
عملے نے مزید بتایا کہ اب ہم کالج کی نئی عمارت میں جاتے ہیں تو زمین پر ہی بیٹھ جاتے ہیں دفتری سامان نہ ہونے کے سبب کچھ کرنے کو بھی نہیں ہے اور اگر طلبہ کلاسز لینے پہنچ گئے تو انھیں بٹھانے کے لیے بھی کچھ نہیں ہے۔
واضح رہے کہ آرٹس اینڈ کامرس کالج سیل کیے گئے اسلامیہ کالج کمپلیکس سے تقریبا 15 کلومیٹر جبکہ سائنس کالج 20 کلومیٹر کی مسافت پر نارتھ کراچی کے علاقے میں ہے، آرٹس اینڈ کامرس کالج سے متعلق تمام ہی ساز و سامان اسلامیہ کالج کمپلیکس میں رہ جانے کے باعث کلاس رومز، دفاتر، لائبریری اور تمام تدریسی و غیر تدریسی استعمال کے لیے مختص کمرے و دفاتر خالی پڑے ہیں۔