Category: تعلیم

پشاور: خیبرپختونخوا حکومت نے سرمائی تعطیلات کے دوران امتحانات لینے پر پابندی عائد کر دی۔پرائیویٹ سکولز ریگولیٹری اتھارٹی خیبرپختونخوا نے نجی سکولز کو مراسلہ جاری کر دیا، نجی سکولوں کو امتحانی شیڈول فوری واپس لینے کی ہدایت کر دی گئی۔مراسلے میں سرمائی تعطیلات میں امتحانات لینا خلافِ ضابطہ قرار دیا گیا ہے، خلاف ورزی پر نجی سکولوں کے خلاف کارروائی کا عندیہ دیا گیا ہے۔پرائیویٹ سکولز ریگولیٹری اتھارٹی خیبرپختونخوا کے مراسلے میں کہا گیا کہ عدم تعمیل پر پی ایس آر اے ایکٹ 2017 کے تحت کارروائی ہوگی۔

ملتان:سکولوں میں سموگ سے بارے آگاہی مہم شروع کرنے کافیصلہ، شیڈول جاری، شجرکاری مہم کی بھی ہدایت تفصیل کے مطابق طلبہ کی صحت کے تحفظ اور عوامی آگاہی کو یقینی بنانے کے لئے فوری طور پر مؤثر اور منظم اقدامات کافیصلہ کیاگیا ہے محکمہ سکولز کی طرف سے جاری مراسلے میں تنبیہ کی گئی ہے کہ فضائی آلودگی خصوصاً سموگ نے گزشتہ برسوں میں شہریوں بالخصوص بچوں کی صحت کو شدید نقصان پہنچایا ہے ، لہٰذا اس کے تدارک اور بچاؤ کے لئے ہر تعلیمی ادارے میں سرگرمیاں شروع کی جائیں سکولوں میں ماحولیاتی تحفظ سے متعلق خصوصی آگاہی سیشنز، تقریری مقابلے ، پوسٹر و چارٹ ڈسپلے ، واکس اور ڈرامہ پرفارمنسز کا انعقاد کیا جائے تاکہ طلبہ سموگ کے نقصانات اور اس کی وجوہات سے بخوبی آگاہ ہوں۔اس کے ساتھ ٹریفک دھوئیں کی روک تھام، کوڑے کرکٹ کو آگ لگانے کی ممانعت اور توانائی کے درست استعمال جیسے موضوعات پر بھی طلبہ کی تربیت کی جائے ۔مراسلے میں شجرکاری کو مہم کا اہم حصہ قرار دیتے ہوئے اداروں کو احکامات جاری کئے گئے ہیں کہ وہ سکول کی سطح پر پودے لگانے کی سرگرمیوں کو فروغ دیں اور بچوں میں ماحول دوست رویوں کی حوصلہ افزائی کریں سکول انتظامیہ کو پابند کیا گیا ہے کہ وہ طلبہ کو ماسک کے استعمال، پانی کی زیادہ مقدار لینے اور کھلی جگہوں پر غیر ضروری سرگرمیوں سے اجتناب کی تلقین کریں تمام سکولزاپنی سرگرمیوں کی تصویری و تحریری رپورٹ باقاعدہ بنیادوں پر متعلقہ ضلعی افسران کو ارسال کرے تاکہ مجموعی مہم کی مؤثر نگرانی اور نتائج کا جائزہ لیا جا سکے محکمہ سکولز نے والدین سے بھی اپیل کی ہے کہ وہ بچوں کی صحت کو ترجیح دیتے ہوئے ان کے حفاظتی تقاضوں پر مکمل عمل کریں سماجی ذمہ داری نبھاتے ہوئے ماحول کو آلودگی سے بچانے کے لئے اپنا کردار ادا کریں، کیونکہ سموگ کے خاتمے کے لئے حکومت اور عوام دونوں کی مشترکہ کوشش ناگزیر ہے ۔

لاہور:پنجاب کے سرکاری سکولوں میں سہولیات کے فقدان کو دور کرنے کا اہم منصوبہ تاحال التوا کا شکار ہے ، جس کے باعث صوبے بھر کے 38 ہزار سکولوں میں بنیادی تعلیمی ضروریات بری طرح متاثر ہو رہی ہیں۔ محکمہ سکول ایجوکیشن کے لیے رواں سال 40 ارب روپے کے فنڈز مختص کیے گئے تھے ، تاہم چھ ماہ گزرنے کے باوجود فنڈز کا اجرا نہ ہوسکا۔ ذرائع کے مطابق صوبے کے سکولوں میں 25 ہزار نئے کلاس رومز بنانے کا منصوبہ بھی فنڈز نہ ملنے کے باعث شروع نہ ہوسکا۔ تعمیراتی کاموں کے آغاز میں تاخیر سے سکولوں میں جگہ کی شدید کمی پیدا ہوگئی ۔ کئی سکولوں میں ڈبل شفٹ کے باوجود کلاس رومز ناکافی ہیں جس سے تدریسی عمل متاثر ہو رہا ہے ۔شدید سردی کے آغاز نے صورتحال مزید خراب کر دی ہے ۔ موسم کی سختی کے باوجود متعدد سکولوں میں بچے کھلے میدانوں یا برآمدوں میں پڑھنے پر مجبور ہیں۔ اس صورتِ حال سے نہ صرف پڑھائی متاثر ہو رہی ہے بلکہ بچوں میں نزلہ، زکام، کھانسی اور دیگر موسمی بیماریوں کے خدشات بھی بڑھ گئے ہیں۔ ہزاروں سکولوں میں فرنیچر کی شدید کمی بھی برقرار ہے ۔ کئی کلاسوں میں بچے فرش پر یا ٹوٹی کرسیوں پر بیٹھ کر پڑھنے پر مجبور ہیں۔والدین اور اساتذہ نے حکومت سے پرزور مطالبہ کیا ہے کہ فنڈز فوری جاری کیے جائیں۔ان کا کہنا ہے کہ بڑھتے ہوئے داخلوں کے باوجود سہولیات میں بہتری نہ آنا تعلیمی نظام کے لیے خطرناک ہے ۔

پشاور: خیبرپختونخوا حکومت نے انصاف فیمیل ایجوکیشن کارڈ کا اجراء کردیا۔وزیراعلیٰ خیبرپختونخوا سہیل آفریدی نے کہا کہ خواتین کو اعلیٰ تعلیم کے ذریعے بااختیار بنانا ہماری ترجیح ہے، تعلیم یافتہ خواتین مضبوط، خوشحال اور باشعور معاشرے کی ضمانت ہیں، انصاف فیمیل ایجوکیشن کارڈ سے 55 ہزار طالبات باریوں تک مفت تعلیم سے مستفید ہوں گی۔انہوں نے کہا کہ پی ٹی آئی حکومت خواتین کو ترقی کے ہر میدان میں برابر مواقع دے رہی ہے، آئندہ بجٹ میں خواتین کی تعلیم کے لیے مزید فنڈز مختص کیے جائیں گے ، پی ٹی آئی دور میں تعلیم کے شعبے میں شفاف اور نتیجہ خیز اقدامات کیے گئے۔وزیراعلیٰ کے پی کے نے مزید کہا کہ یہ کارڈ خواتین کے لیے امید، خود اعتمادی اور وقار کی نئی علامت ہے، خیبر پختونخوا خواتین کی اعلیٰ تعلیم کے فروغ میں ماڈل صوبہ بنے گا۔سہیل آفریدی نے اس موقع پر ایم ڈی کیٹ ٹیسٹ پاس کرنے والے یتیم طلبہ کے لیے مفت اعلیٰ تعلیم فراہم کرنے کا بھی اعلان کیا۔

لاہور:وفاقی وزیر اطلاعات و نشریات عطا اﷲتارڑ نے کہا ہے کہ تعلیم میں ترقی ہی ملک اور معاشرے کے روشن مستقبل کی ضمانت ہے ، پاکستان کے نوجوانوں کے ہنر اور تخلیقی صلاحیتوں کی دنیا معترف ہے ، وزیراعظم شہباز شریف نے نوجوانوں کو بااختیار بنانے کی پالیسیاں بنائیں، پورے ملک کے نوجوانوں کو مساوی مواقع میسر آرہے ہیں۔ اتوار کو مقامی یونیورسٹی لاہور کے کانووکیشن سے بذریعہ ویڈیو لنک خطاب کرتے ہوئے وفاقی وزیر اطلاعات نے یونیورسٹی کے فارغ التحصیل طلبہ کیلئے نیک خواہشات کا اظہار کرتے ہوئے کہا کہ طلبا جو خواب لے کر اپنی فیلڈ میں آئے اور آج اس مقام پر پہنچے ، میں ان کی محنت کو سراہتا ہوں،یونیورسٹی کی فیکلٹی، وائس چانسلر، چیئرمین بورڈ آف گورنرز کو مبارکباد پیش کرتا ہوں ، علم حاصل کرنا اور اسے آگے لوگوں تک پہنچانا بہت ہی اہم فریضہ ہے ۔ وفاقی وزیر عطا اﷲتارڑ نے کہا کہ ملک کی ترقی کیلئے تعلیمی اداروں، اساتذہ اور طلبا کا بڑا کردار ہے ، ہماری آبادی کا 68 فیصد حصہ نوجوانوں پر مشتمل ہے ، نوجوانوں کو سکلز کے ساتھ تربیت دینا وقت کی اہم ضرورت ہے جسے یونیورسٹی احسن طریقے سے سرانجام دے رہی ہے ۔