Category: تعلیم

لاہور :پنجاب بھر میں تعلیمی بورڈز نے انٹرمیڈیٹ پارٹ ون کے نتائج کا اعلان کردیا ،لاہور بورڈ میں 92ہزار 541طلبہ کامیاب ہوئے جبکہ نتیجہ 53اعشاریہ 77فیصدرہا ،دوسری طرف پرچوں کی ری اکاؤنٹنگ کی بجائے مکمل ری چیکنگ کی سہولت فراہم کرنے کا فیصلہ کرلیاگیا ۔تفصیلات کے مطابق سیکرٹری لاہور بورڈ رضوان نذیر اور کنٹرولر امتحانات توصیف الرحمن نے پریس کانفرنس میں نتائج کااعلان کرتے کہا کل ایک لاکھ 75 ہزار 950 امیدواروں نے امتحان میں حصہ لیا، 92ہزار 541 کامیاب قرار پائے ۔72ہزار 690طلبا اور ایک لاکھ 3ہزار260طالبات نے امتحان دیا،ایک لاکھ 8 ہزار269 کا تعلق سائنس گروپ جبکہ67 ہزار681 کا تعلق آرٹس گروپ سے تھا۔سیکرٹری لاہور بورڈ نے کہاطلبہ کو اب ری اکاؤنٹنگ کی بجائے مکمل ری چیکنگ کی سہولت دی جائیگی۔اس مقصد کیلئے بورڈ قوانین میں ترمیم کی جا رہی ہے اور منظوری کیلئے کابینہ کو سمری ارسال کی جائیگی۔یہ اقدام امتحانی شفافیت اور میرٹ کے فروغ کی جانب اہم قدم ہے ۔گوجرانوالہ بورڈکے امتحان میں 142101امیدوار شامل ہوئے 1009 کامیاب قرار پائے کامیابی کی شرح49اعشاریہ 97فیصد رہی۔فیصل آباد بورڈ میں 108182طلبا وطالبات شریک ہوئے 60302 پاس ہوئے ،کامیابی کا تناسب 55.74 فیصد رہا۔ ساہیوال بورڈ میں 42529 طلبا و طالبات شریک ہوئے ،23182 نے کامیابی حاصل کی،کامیابی کا تناسب54اعشاریہ 51فیصد رہا۔ ملتان بورڈ میں مجموعی طور پر 74ہزار363امیدواروں نے شرکت کی ، 42ہزار730پاس اور 31ہزار 633فیل ہوگئے ، کامیابی کی شرح 57اعشاریہ 46فیصد رہی۔ بہاولپور بورڈ میں 57720اُمیدواروں نے شرکت کی اور 29981 نے کامیابی حاصل کی،نتیجہ کا تناسب 53اعشاریہ 17فیصد رہا ۔ ڈیرہ غازی خان بورڈ میں 54ہزار 954 طلباو طالبات نے امتحان دیااور37ہزار 277کامیاب ہوئے ، کامیابی کا تناسب 62 اعشاریہ 37 فیصد رہا ۔

سلام آباد: وفاقی وزیر تعلیم و پیشہ ورانہ تربیت ڈاکٹر خالد مقبول صدیقی نے گزشتہ روز نمل کا دورہ کیا۔ وفاقی وزیر تعلیم کو جامعہ نمل کراچی پہنچنے پرریکٹر نمل میجر جنرل ریٹائرڈ شاہد محمود کیانی اور ریجنل ڈائر یکٹر بریگیڈئیر ریٹائرڈ سید ہدایت وارث نے استقبال کیا۔ اس موقع پر ریکٹر نمل نے وفاقی وزیر کو جامعہ میں جاری کورسز اور دیگرمنصوبوں سے متعلق تفصیلات سے آگاہ کیا۔بعدازاں خالد مقبول صدیقی نے اساتذہ اور طلبا سے ملاقات کی اور خطاب کیا، انہوں نے کہا دنیا نے ہر چیز بدل کر رکھ دی ہے ہمیں بھی عصر حاضر کے تقاضوں کے مطابق خود کو بدلنا ہوگا۔ انہوں نے جامعہ کی تعلیمی سرگرمیوں کو سرا ہا اور کہا کہ نمل نے پاکستان کے روشن مستقبل کی بنیاد رکھ دی ہے۔ انہوں نے کہا ہمیں اپنی اردوزبان پر بھی توجہ مرکوز کرنے کی ضرورت ہے، اس موقع پر وفاقی وزیر کو نمل کی طرف سے اعزازی شیلڈ بھی پیش کی گئی۔

ملتان:پنجاب بھر کے 38 ہزار سکولز کو فنڈز کی کمی کا سامنا ہے ، جس کے باعث تعلیمی سرگرمیاں متاثر ہو رہی ہیں بتایا گیا ہے کہ نیامالی سال شروع ہوئے 3ماہ گزر گئے مگر سکولوں کونان سیلری بجٹ جاری نہ ہوسکا،محکمہ سکول ایجوکیشن نے سکولوں کو نان سیلری بجٹ جاری نہ کیا،سکولوں میں بنیادی سہولیات کو پورا کرنے کیلئے نان سیلری بجٹ درکار ہوتا ہے رواں مالی سال میں اب تک سکولوں کو پہلی قسط ہی جاری نہیں ہوسکی،سکولوں کو ہر تین ماہ بجٹ کی ایک قسط جاری کی جاتی ہے ،لاہور کے سکولوں کیلئے فی سہ ماہی 16 کروڑ کے فنڈز جاری کئے جاتے ہیں،سکولوں کے پاس فنڈز درکار نہ ہونے سے بلز کی ادائیگیوں میں بھی تاخیر کا سامنا کرنا پڑ رہا ہے ۔سکول سربراہوں نے وزیراعلیٰ سے نوٹس کی اپیل کی ہے۔

اسلام آباد :سلطنتِ عمان کے سفیر فہد خلف الخروصی نے اسلام آباد میں وفاقی وزیر برائے تعلیم و پیشہ ورانہ تربیت خالد مقبول صدیقی سے ملاقات کی۔فریقین نے تعلیم کے شعبے میں تعاون کو مزید فروغ دینے کے عزم کا اظہار کیا۔ خالد مقبول نے کہا کہ پاکستان اور عمان کے تعلقات تاریخی بنیادوں پر قائم ہیں اور باہمی دوستی پر مبنی یہ تعلقات خطے میں استحکام کا باعث ہیں۔ عمان کے ساتھ تعلیم کے شعبے میں تعاون کے نئے راستے کھلیں گے۔ عمانی سفیر نے کہا کہ عمان نے جدیدیت کو اپنایا ہے لیکن اپنی ثقافت کو بھی محفوظ رکھا ہے۔ انہوں نے اس بات کی یقین دہانی کرائی کہ دونوں ممالک کی وزارتِ تعلیم کے درمیان تعاون کو مزید مضبوط بنایا جائے گا، انہوں نے وفاقی وزیر کو اپنے دفتر آنے کی دعوت بھی دی۔

لاہور: چیئرمین پاکستان علما کونسل حافظ طاہر اشرفی نے کہا ہے کہ پاکستان مختلف مذاہب اور مسالک کے ماننے والوں کا ملک ہے۔میڈیا سے گفتگو کرتے ہوئے چیئرمین پاکستان علما کونسل حافظ طاہر اشرفی کا کہنا تھا کہ پاکستان میں مختلف مذاہب کے افراد بستے ہیں، ہمارا پیغام امن، محبت، رواداری اور بھائی چارہ ہے، مذہبی ہم آہنگی کا فروغ ہماری ترجیح ہے۔انہوں نے کہا کہ بشپ آزاد پاسٹر بھی ہمارے ساتھ موجود ہیں بشپ صاحب امریکہ سے تشریف لائے ہیں، آج ہم امن اور رواداری کی بات کر رہے ہیں، ہمارے انبیاء کرامؑ کا پیغام بھی امن کا پیغام تھا۔حافظ طاہر اشرفی نے کہا کہ فلسطین میں مسلمان اور مسیح نشانہ بن رہے ہیں، مسیح برادری کا پاکستان میں بہت اہم کردار رہا ہے۔بشپ آزاد مارشل نے گفتگو کرتے ہوئے کہا کہ مجھے بہت خوشی ہے کہ آج میں یہاں آیا ہوں، پاکستانی میں مسیحی قوم پاکستان بننے سے پہلے سے یہاں موجود ہے، ہمارے مسیحی نوجوان پاک فوج میں بھی موجود ہیں۔انہوں نے کہا کہ جو دہشت گردی کرتے ہیں وہ مسلمان نہیں ہوسکتے، جو دنیا میں بمباری کرتے ہیں وہ مسیح نہیں ہوسکتے، امن کا پیغام ہم مل کر پھیلا سکتے ہیں۔اس موقع پر کو آرڈی نیٹر آف پیغام امن کمیٹی کے ممبر آرتھ بشپ فولی بیچ نے میڈیا سے گفتگو کرتے ہوئے کہا کہ ہمیں امن کی بات کرنی چاہئے، ہم کو سب کے ساتھ پیار کرنا چاہئے۔انہوں نے کہا کہ ہمیں اپنے دشمنوں کے ساتھ پیار کرنا چاہئے، انسانیت کے لئے ہمارا نمونہ آپ کو پسند آئے گا، مجھے خوشی ہے کہ میں آج ساتھ شامل ہوں۔