اسلام آباد: وفاقی وزیر داخلہ رانا ثنا اللہ کا کہنا ہے کہ سپریم کورٹ کے ججز آمنے سامنے ہوں تو پارلیمنٹ کو کردار ادا کرنا چاہیے۔

وزیرداخلہ رانا ثنا اللہ نے سپریم کورٹ کے باہر میڈیا سے گفتگو کرتے ہوئے کہا کہ عدالت سے انصاف اور ملک میں قانون کی حکمرانی کے لیے عدالت اعظمیٰ کا کردار چاہتے ہیں۔

انہوں نے کہا کہ اس سے پہلے جو ناانصافیاں ہوئی لوگوں کو اس پر اعتراض ہے۔ ججز بھی کہہ رہے ہیں فیصلہ 4 تین سے تھا۔ یہ عدالت کا اندرونی معاملہ نہیں ہے۔ آج بھی استدعا ہے سوموٹو کو فل کورٹ کی طرف لے جایا جائے۔

وزیرداخلہ کا مزید کہنا تھا کہ سپریم کورٹ کے پاس اخلاقی اتھارٹی ہے۔ جب سپریم کورٹ کے ججز آمنے سامنے ہوں اس وقت پارلیمنٹ کو اپنا کردار ادا کرنا چاہیے۔ اگر دو اسمبلیوں کے الیکشن اس طرح سے ہوئے تو کوئی تسلیم نہیں کرے گا۔ نگراں حکومت کے سیٹ اپ کے تحت تمام صوبوں میں الیکشنز ایک ساتھ ہونے چاہئیں ۔ پنجاب میں 50 فیصد سیٹیں ہیں۔

رانا ثنا اللہ نے کہا کہ یہ ملک کو مستقل افراتفری کے سپرد کرنے والی بات ہے۔ جب تک ہمت ہے اس چیز کو روکیں گے۔ جب میدان لگے گا سب کچھ سامنے آ جائے گا۔ کل پارلیمنٹ میں ایک بل پیش ہوا ہے آج امید ہے منظور ہو جائے گا۔ اس بل کے تحت کوئی بابا رحمت ںا بابا زحمت ثابت نہیں پو گا۔ سپریم کورٹ آف پاکستان قوم کی رہنمائی کرے گی۔

جامعہ کراچی کے شعبہ ٹرانسپورٹ نے ڈیزل کی قیمتوں میں مسلسل اضافے کو جواز بناتے ہوئے یونیورسٹی کیمپس میں شٹل سروس کی نقل و حمل کو محدود کر دیا ہے اور صبح و شام میں شٹل کے اوقات بھی کم کر دیے گئے ہیں جس سے یونیورسٹی میں ایک سے دوسرے شعبوں یا کلیہ جات (فیکلٹی) کی جانب جانے والے طلباء و طالبات کو شدید مشکلات کا سامنا ہے۔

شدید گرمی میں طلبہ کئی کلومیٹر پیدل سفر کرنے پر مجبور ہیں یا پھر کیمپس میں ایک سے دوسرے مقام تک جانے والی پرائیویٹ گاڑیوں سے لفٹ مانگتے نظر آتے ہیں جبکہ مختلف امور کی انجام دہی کے لیے جامعہ کراچی میں آنے والے افراد کو بھی شٹل سروس خالی ہی ملتی ہے۔

یہ صورتحال ایسے وقت میں سامنے آئی ہے کہ جب ایچ ای سی کے فنڈز سے خریدی گئی 8 نئی بسیں یونیورسٹی کی شٹل اور پوائنٹ بسوں کا حصہ بن چکی ہیں جبکہ سابقہ سٹی گورنمنٹ کے تحت چلنے والی 4 بسیں بھی حال ہی میں جامعہ کراچی کو دی گئی ہیں۔

دوسری جانب، جامعہ کراچی میں پرائیویٹ شٹل سروس تو موجود ہے تاہم اس کی تعداد پہلے ہی محدود ہے جو طلبہ سے 20 روپے بھی چارج کرتی ہے۔ اس پرائیویٹ شٹل سروس کے پاس صرف 8 گاڑیاں ہیں جبکہ جامعہ کراچی میں صبح اور شام میں 45 ہزار طلبہ زیر تعلیم ہیں اور روزانہ مختلف تعلیمی و تدریسی امور کی انجام دہی کے سلسلے میں محتاط اندازے کے مطابق مزید کئی ہزار لوگ کیمپس کا رخ کرتے ہیں۔

شٹل سروس کے محدود ہونے کے سبب کیمپس کے اندر ایک سے دوسری جگہ جانے والے افراد مشکلات کا شکار رہتے ہیں اور اس کا فائدہ یونیورسٹی کے اندر موجود رکشا مافیا اٹھا رہی ہے جنھوں نے کیمپس کے اندر باقاعدہ اپنے اسٹینڈ بنا رکھے ہیں اور منہ مانگا کرایا وصول کرکے سواری کو ایک سے دوسری جگہ پہنچاتے ہیں۔

بتایا جا رہا ہے کہ جامعہ کراچی کا محکمہ ٹرانسپورٹ اور اس رکشہ مافیا کے مابین ایک خاموش سمجھوتا ہے جس کے سبب یونیورسٹی میں شٹل سروس اور اس کے اوقات کو محدود کر دیا گیا ہے۔ قابل ذکر امر یہ ہے کہ صبح کے وقت کراچی کا درجہ حرارت بھی 30 ڈگری سینٹی گریڈ کے آس پاس ہوتا ہے اور اس گرمی کی شدت میں اب رمضان کے آغاز پر طلباء و طالبات حالت روزہ میں پیدل سفر کرنے پر مجبور ہیں۔

اسلامک لرننگ کی ایک طالبہ آمنہ علی نے ’’ایکسپریس‘‘ کو بتایا کہ وہ اور ان سمیت سیکڑوں ایسے طلبہ ہیں جو اس مشکل کو جھیل رہے ہیں، 10 بجے کے بعد جب ہم اپنے شعبے سے نکل کر کسی دوسرے شعبے یا فیکلٹی میں جانا چاہتے ہیں تو شٹل سروس دستیاب نہیں ہوتی۔

مذکورہ طالبہ نے بتایا کہ اس سے قبل ان کے علاقے منظور کالونی کا پوائنٹ بند کر دیا گیا تھا، اس وقت ٹرانسپورٹ انچارج قدیر محمد علی تھے جنھوں نے ہماری شکایت کا فوری نوٹس لیتے ہوئے اس کا ازالہ کیا تھا تاہم اب معلوم ہوا ہے کہ وہ ریٹائر ہوگئے ہیں، ہم نے نئے انچارج کو اس سلسلے میں درخواست بھی دی ہے لیکن کوئی شنوائی نہیں ہوئی۔

قابل ذکر امر یہ ہے کہ شعبہ فارمیسی، شعبہ کمپیوٹر سائنس اور شعبہ ابلاغ عامہ کے طلبہ اس صورتحال سے سب سے زیادہ متاثر ہیں کیونکہ یہ شعبہ جات اپلائیڈ اکنامکس ریسرچ سینٹر اور میٹروول گیٹ کے مابین شاہراہ پر قائم ہیں اور شٹل سروس مفقود ہونے کے سبب کئی کئی کلومیٹر سفر کرنے پر مسکن گیٹ یا سلور جوبلی گیٹ تک پہنچ پاتے ہیں۔

شعبہ فارمیسی کی ایک طالبہ کا کہنا تھا کہ ’’جب وہ اور ان کے کلاس فیلوز شعبے سے باہر آتے ہیں تو تپتی ہوئی دھوپ میں وہ پیدل چلنے پر مجبور ہوتے ہیں یا 20 روپے دے کر پرائیویٹ شٹل میں بیٹھتے ہیں لیکن پرائیویٹ شٹل بھی کم کم ہی ملتی ہے‘‘۔

واضح رہے کہ آغاز سیمسٹر پر روایتی طور پر جاری ہونے والے شٹل سروس کے شیڈول کے مطابق یہ سروس صبح، دوپہر اور شام کے اوقات میں دستیاب ہونی ہے۔ صبح کے اوقات میں ساڑھے 10 سے 1 بجے تک شٹل سروس زیادہ تعداد میں سلور جوبلی گیٹ، مسکن گیٹ، میٹروول گیٹ اور شیخ زید گیٹ تک چلائی جانی ہے تاہم یہ سروس ساڑھے 9 بجے ہی بند ہوجاتی ہے۔

ٹرانسپورٹ سیکریٹری کا چارج رکھنے والے گریڈ 16 کے ملازم دلدار خان سے رابطہ کیا تو انھوں نے پہلے تو انتہائی مضحکہ خیز جواز پیش کیا کہ ’’شہر سے طلبہ کو کیمپس لانے والی بسوں کو ورکشاپ میں بھجوا کر ان کی فٹنس چیک کرنی ہوتی ہے کیونکہ دوپہر میں دوبارہ یہ بسیں شہر کی طرف جاتی ہیں اس لیے ہم ساڑھے 9 بجے تک شٹل سروس چلاتے ہیں تاہم جب ان سے استفسار کیا گیا کہ ماضی میں کیا بسوں کو فٹنس کے لیے ورکشاپ نہیں جانا ہوتا تھا پھر کیسے شٹل سروس دوپہر تک چلتی تھی جس پر انھوں نے انکشاف کیا کہ اب ڈیزل مہنگا ہوگیا ہے ہم طلبہ سے شہر کے مختلف علاقوں کا کرایہ صرف 10 روپے چارج کرتے ہیں اور اخراجات پورے نہیں ہوتے اس لیے بھی ساڑھے 9 کے بعد شٹل سروس نہیں ہوتی۔

واضح رہے کہ 8 نئی بسوں کی شمولیت کے بعد اس وقت کراچی یونیورسٹی کی 29 بسیں فعال ہیں۔ سابقہ سٹی گورنمنٹ کی بسیں ملنے کے بعد اس کی تعداد 33 اور ورکشاپ میں مرمت کے لیے کھڑی مزید 8 بسوں کو ملا کر یہ تعداد 41 ہوجاتی ہے تاہم سٹی گورنمنٹ کی بسوں کو سی این جی سے ڈیزل انجن پر شفٹ کیا جانا باقی ہے جبکہ ورکشاپ میں مرمت کے لیے کھڑی 8 بسیں فنڈز ملنے کی منتظر ہیں۔ دوسری جانب 6 بسیں علیحدہ ہیں جو ناکارہ ہوچکی ہیں ان کی نیلامی ہونی ہے۔

لاہور: دارالعلوم جامعہ نعیمیہ کے مفتیان کرام نے توشہ خانہ کے قانون کو غیر شرعی قرار دینے کا فتویٰ جاری کردیا جس میں کہا ہے کہ توشہ خانہ سے کم قیمت پر اشیاء خریدنا جائز نہیں کیوں کہ یہ تحائف ملک و قوم کی امانت ہیں کسی کی ذاتی ملکیت نہیں۔

شرعی فتویٰ جاری کرنے والوں میں ناظم اعلیٰ جامعہ نعیمیہ و ممبر اسلامی نظریاتی کونسل علامہ ڈا کٹرمفتی راغب حسین نعیمی، شیخ الفقہ مفتی محمد عمران حنفی، مفتی محمد ندیم قمر، مفتی محمد عارف حسین، مفتی فیصل ندیم شازلی شامل ہیں۔

دارالعلوم جامعہ نعیمیہ کے مفتیان کرام نے فتویٰ میں کہا ہے کہ توشہ خانہ سے کم قیمت پر اشیاء خریدنا شرعی لحاظ سے جائز نہیں، حکومتی عہدے پر فائز شخص کو ملنے والا تحفہ اپنی ملکیت میں رکھنے پر رسول اللہ ﷺ نے تنبیہ فرمائی لہذا حکومتی عہدے داروں کو ملنے والے تحائف خواہ چھوٹے ہوں یا بڑے وہ ریاست کی ملکیت ہوں گے اور ریاست کے خزانے میں جمع ہوں گے۔

مفتیان کرام نے کہا ہے کہ حکومتی ذمہ داران کا تحفوں کا اپنی ملکیت میں رکھنا یا اس کی بیس فی صد یا پچاس فی صد قیمت دے کر لے لینا جائز نہیں، اگر کوئی حاکم یا حکومتی عہدے دار اس تحفے کو چھپا لے تو اس کا ایسا کرنا ناجائز و حرام اور قابل گرفت عمل ہے، توشہ خانہ کے تحائف ملک و قوم کی امانت ہیں انہیں عوامی فلاح و بہبود پر ہی خرچ ہونا چاہیے۔

فتویٰ میں کہا گیا ہے کہ احادیث مبارکہ کے مطابق حکومتی عہدے داروں کو ملنے والے تحائف ریاست کے خزانے میں جمع ہوں گے،سربراہان مملکت، وزراء اور دیگر حکومتی سرکاری عہدے داروں کو غیر ملکی دوروں سے ملنے والے تحائف کو بیس فی صد یا پچاس فی صد رقم پر خرید نے کا ملکی قانون شرعاً درست نہیں ہے۔

علما نے کہا کہ اگر سربراہان و عہدے داران ان تحائف کو اپنی ملکیت میں لانا چاہیں تو ان کی مارکیٹ ویلیو کے مطابق پوری قیمت ادا کرنے کے بعد ہی لاسکتے ہیں، اس کا بہتر حل یہ ہے کہ ان تحائف کو نیلام کیا جائے اور نیلامی میں ہر خاص و عام کو شرکت کی اجازت ہو، اس نیلامی سے حاصل ہونے والی رقم کو قومی خزانے میں جمع کروایا جائے کیوں کہ یہ تحائف ریاست کی ملکیت ہیں۔

لاہور: مسلم لیگ ق کے رہنما اور سابق وزیر اعلیٰ پنجاب چوہدری پرویز الہیٰ نے کہا ہے کہ ججز کی آڈیو مریم نواز کی سرپرستی میں چلنے والے میڈیا سیل نے لیک کی۔

چوہدری پرویز الہی نے اپنے بیان میں آڈیو لیک کو عدلیہ کے خلاف منظم مہم قرار دیتے ہوئے اس کی مذمت کی اور کہا کہ مسلم لیگ ن مریم نواز کی قیادت میں ایک بار عدلیہ پر حملہ آور ہے۔

انہوں نے کہا کہ مریم نواز اپنے والد کی عدلیہ مخالف روایت کو ہی آگے بڑھا رہی ہیں، نواز شریف نے سپریم کورٹ پر براہ راست حملہ کیا، اب نوازشریف اور شہبازشریف کے کہنے پر مریم نواز اور ان کا پراپیگنڈہ سیل عدلیہ کے خلاف مہم چلا رہے ہیں۔

چوہدری پرویز الہیٰ نے کہا کہ اب معزز جج صاحبان کے فون ٹیپ کئے جارہے ہیں، رانا ثناء اللہ حکومتی وسائل عدلیہ کے خلاف استعمال کر رہے ہیں، مسلم لیگ ن کا آڈیو لیک کا ڈرامہ بری طرح فلاپ ہو چکا ہے اس لیے اب وہ کچھ نیا سوچیں۔

استنبول: ترکیہ کے جنوبی صوبے ہاتے میں تقریباً 68 گھنٹے بعد ملبے تلے دبے بچے کو زندہ نکال لیا گیا جس کی ویڈیو سوشل میڈیا وائرل ہے۔

ترک خبر رساں ادارے ٹی آر ٹی کے مطابق امدادی کارکنان نے بتایا کہ ہیلن نامی بچے کی حالت ٹھیک اور اسے طبی یونٹ کی نگرانی میں رکھا گیا ہے۔

اسی طرح، آدیامان صوبے میں سرچ اور ریسکیو ٹیم نے ایک ہی خاندان کے چار افراد کو ملبے کے نیچے سے زندہ نکال لیا۔ فوٹیج میں دکھایا گیا ہے کہ زندہ بچ جانے والوں میں سے تین کو اسٹریچر پر لے جایا جا رہا ہے۔

واضح رہے کہ ترکیہ اور شام میں آنے والے 7.8 شدت کے زلزلے سے اب تک جاں بحق افراد کی تعداد 15ہزار سے تجاوز کر چکی ہے۔

ترکیہ میں جاں بحق افراد کی تعداد 12ہزار 391 اور شام میں مرنے والوں کی تعداد 2ہزار992 تک پہنچ گئی ہے۔ زلزلے سے دونوں ممالک میں ہزاروں عمارتیں زمین بوس ہوگئیں۔

٭دُنیا بار ہا بھارت کے اس بے بُنیاد دعوے کو مسترد کر چکی ہے کہ کشمیر بھارت کا اندرونی معاملہ ہے۔

بھارت کے اپنے اپوزیشن لیڈر آرٹیکل370کی منسوخی کو آئین پر حملہ، تباہ کُن اور بھارتی ریاستی تاریخ کا سیاہ ترین باب قرار دے چکے ہیں۔

بھارت کے اس اقدام سے کشمیر ایک بار پھر بین الاقوامی سطح پر اُبھر کر سامنے آگیا ہے۔

بھارتی اقدامات اقوامِ متحدہ کی اٹھارہ قراردادوں کی کھلم کھلا خلاف ورزی کے زمرے میں آتے ہیں۔

جموں وکشمیر پیلپز ڈیموکریٹک پارٹی کی رہنما محبوبہ مفتی کا کہنا ہے کہ آپ ایک خیال کو قید نہیں کر سکتے بلکہ ایک اچھے خیال کا مقابلہ صرف ایک بہتر خیال ہی کرسکتا ہے۔

جب اختلاف رائے کے حق کو زبردستی کچلنے کی کوشش کی جاتی ہے تو لوگوں کو دیوار سے لگائے جانے کا احساس ہوتا ہے جس کے نتیجہ میں مزید اختلاف اور بیگانگی بڑھتی ہے۔محبوبہ مفتی

کشمیری رہنماعمر عبداللہ نے کہا کہ مُودی کے اقدامات ہمارے وطن کو ہندو وطن ثابت کرنا چاہتے ہیں جو کہ بھارتی آئین کے سراسر منافی ہے۔ ہم کشمیر کی خصوصی حیثیت کو بحال کروائیں گے۔

اب کشمیر اور پنجاب سمیت بھارت کے مختلف علاقوں میں آزادی کے نعرے بُلند تر ہوتے جا رہے ہیں۔ آج دُنیا کے ایوانوں میں کشمیری عوام کے حق میں آوازیں اُٹھ رہی ہیں۔

اگست 2019سے اب تک عالمی میڈیا مقبوضہ کشمیر میں جاری بھارت کے انسانیت سوز اور غیر جمہوری اقدامات کی مذمت کرتا آرہا ہے۔

اقوامِ متحدہ کے سیکرٹری جنرل اینٹو نیو گوتریس نے اس بات پر زور دیا کہ مسئلہ کشمیر کا کوئی فوجی حل ممکن نہیں اور پاکستان اور بھارت کے درمیان کسی بھی قسم کی محاذ آرائی کے نتائج خطے اور دُنیا کے لئے تباہ کُن ہونگے۔

اس کے علاوہ Genocide WatchاورHuman Rights Watchکی کشمیر میں جاری نسل کُشی اور انسانی حقوق کی پامالیوں پر مبنی رپورٹس بھی ناقابلِ تردید دستاویزات ہیں۔

برطانوی نشریاتی ادارے بی بی سی نے کشمیر کی صورتحال پر تبصرہ کرتے ہوئے کہا کہ مودی حکومت نے بھارت کے کمزور وفاقی ڈھانچے کو کاری ضرب لگا دی ہے۔

واشنگٹن پوسٹ نے اس غیر آئینی اقدام کوIndia’s Dark Moment in Kashmirقرار دیا۔

دی گارڈین نے اسے کشمیر کو انڈین کالونی بنانے کی کوشش سے تعبیر کیا۔

اس کے ساتھ ساتھ برطانوی پارلیمان کے ارکان نے بھی مقبوضہ کشمیر میں جاری قتل و عام اور عورتوں پر جنسی تشدد کے واقعات کی بھرپور مذمت کی۔معزز اراکین نے کہا کہ ستر سال سے زیادہ عرصے سے کشمیری ایک جہنم میں رہ رہے ہیں اور آج حقِ خود ارادیت تو درکنار ان کا اپنا وجود خطرے میں پڑ گیا ہے۔ برطانوی پارلیمان کے ممبران نے کھل کر بھارتی ریاستی دہشتگردی کے خلاف اور مقبوضہ کشمیر کے مظلوم عوام کے حق میں آواز اُٹھائی۔

بی بی سی کی ایک رپورٹ کے مطابق بھارتی وفاقی حکومت ریاستوں کے مقابلہ میں یونین کے علاقوں کو کم خود مختاری دیتی ہے۔کشمیر کی خصوصی حیثیت ختم کرنے کیلئے مقامی آبادی اور سیاستدانوں سے مشورہ نہیں کیا گیا۔

بھارتی اسکالر ننوت چڈھا بہیرا نے کہا کہ بھارت میں جمہوری اصولوں کو ختم کیا جا رہا ہے۔

نوبل انعام یافتہ امریتہ سین نے این ڈی ٹی وی کو انٹرویو دیتے ہوئے کہا کہ مجھے نہیں لگتا کہ جمہوریت کے بغیر بھی کشمیر کی کوئی قرار داد ہوگی کیونکہ یہ جمہوریت کی راہ میں رکاوٹ ہو گی۔ ایک ہندوستانی ہونے کے ناطے اس بات پر فخر نہیں ہے کہ بھارت نے جمہوری اصول کو ہندوستان میں رائج کرنے کے بعد کہ جہاں وہ دُنیا بھر میں جمہوریت کیلئے جانا جانے والا ملک تھا لیکن اب ہم وہ ساکھ کھو چکے ہیں۔ امریتہ سین نے جموں و کشمیر کی مرکزی قیادت کو نظر بند رکھنے کو شدید تنقید کا نشانہ بناتے ہوئے کہا کہ مجھے نہیں لگتا کہ کشمیر کے قائدین اور عوام کے نقطہ نظر سنے بغیر بھی انصاف حاصل کیا جا سکے گا۔

مسٹر شرما کا کہنا ہے کہ میں بھارتی قوم کو بتانا چاہتا ہوں کہ کشمیر کو آج آزاد کر دیا ہے کیونکہ جو معاہدہ تھا وہ ختم ہو گیا ہے۔

معروف آسٹریلین کالم نویس سی جے ورلیمن نے اپنے ایک ٹویٹ میںکہا کہ مسلسل ظلم و ستم اور تناؤ کے باعث بالغ کشمیری دماغی امراض کا شکا ر ہو چکے ہیں۔ جن متنازع علاقوں میں سیکورٹی اہلکاروں کے ہاتھوں جنسی تشدد کی شرح سب سے زیادہ ہے ان میں مقبوضہ کشمیر بھی شامل ہے۔

جموں وکشمیر کیلئے رائے دینے والے ٹوئیٹر اور فیس بُک کے صارفین کے اکاؤنٹس معطل کئے گئے۔

بھارت کی طرف سے بہیمانہ اقدام کی بدترین مثال اس وقت منظر عام پر آئی جب بُرہان وانی کی رائے کو ٹوئیٹر اور فیس بُک سے ہٹا کر اکاؤنٹس کو معطل کیا گیا۔

نیلم کماری کی موت بھارتی ریاست کے ناکام ہیلتھ سسٹم پر ایک سوالیہ نشان ہے جبکہ ایسی بہت سی خواتین حید ر آباد اور کشمیر میں بھی مر رہی ہیں۔

نواب آف جونا گڑھ نے بھی ہندوستان کا اصلی چہرہ بے نقاب کیا۔ ان کا کہنا تھا کہ ہندوستان دراصل منافقانہ، دوہرے معیار، اقلیتوں اور بُنیادی انسانی حقوق کی پامالی کا نام ہے۔ بھارت کے تمام تر ناکام کوششوں اور ڈراموں کے باوجود دُنیا بخوبی جان چکی ہے کہ مقبوضہ کشمیر میں انسانی حقوق کی سنگین خلاف ورزیاں جاری ہیں۔ بین الاقوامی قانون کی یوں دھجیاں اُڑانے والے بھارت کا مکروہ چہرہ اب دُنیا کے سامنے کھل کر آ چکا ہے۔

ای ۔یو ۔ڈس انفو لیب کی چشم کُشا رپورٹ نے بھارت کے عالم گیر پروپیگنڈے کو بری طرح بے نقاب کیا۔

موجودہ علاقائی اور عالمی صورتحال کے تناظر میں5 فروری2022کو دُنیا بھر میں کشمیر کے مظلوم عوام کے ساتھ اظہار یکجہتی کے زبردست مظاہرے دُنیا کو ایک بار پھر باور کرائیں گے کہ سات دہائیوں سے حل طلب یہ بین الاقوامی مسئلہ ایک انسانی اَلمیہ ہے اور علاقائی اور عالمی امن و استحکام کیلئے سنگین خطرہ ہے۔

مغربی دارلحکومتوں میں جمہوریت اور انسانی حقوق کی بات کی جارہی ہے اور کشمیر کے محکوم عوام کے حقوق کی مسلسل پامالی کے خلاف اب مزید زور دار اور مؤثر آوازیں اُٹھیں گی۔

مقبوضہ کشمیر کے المیے پر دنیا کا عدل پر مبنی رد عمل یقیناً قابل قدر ہے لیکن اس سے بھارت کا رویہ نہیں بدلے گا، نہ عالمی برادری اس حد تک جائے گی کہ بھارت اپنا رویہ بدلنے پر مجبور ہو۔ کشمیر کو آزاد کرانے کی ذمہ داری پاکستان پر ہی عائد ہوتی ہے اور ہمیں ہی مظلوم کشمیریوں کی داد رسی کے لئے آگے آنا ہو گا۔

پشاور پولیس لائنز مسجد میں خودکش دھماکے میں شہدا کی تعداد 100ہو گئی ہے۔ان شہداء میں 93پولیس اہلکار شامل ہیں۔ پولیس اور دیگر شہدا کو ان کے آبائی علاقوں میں سپرد خاک کر دیا گیا، شہدا کے جنازوں میں بڑی تعداد میں لوگوں نے شرکت کی ہے۔

ادھر دھماکے کے بعد ریسکیو آپریشن مکمل ہوگیا اور وہاں نماز کی ادائیگی کا سلسلہ ایک بار پھر شروع ہوگیا ہے، اس افسوسناک واقعہ کے بعد خیبرپختونخوا کے نگران وزیراعلیٰ اعظم خان نے صوبے میں ایک روزہ سوگ کا اعلان کیا، یوں منگل کو خیبرپختونخوا میں سرکاری عمارتوں پر قومی پرچم سرنگوں رہا جب کہ ملک بھر میں فضا سوگوار رہی۔ پشاور پولیس لائنز سانحہ کی تحقیقات جاری ہیں۔

ابتدائی طور پر اس سانحہ کے مختلف زاویوں پر غور کیا گیا ہے۔یہ خدشہ ظاہر کیا گیا ہے کہ خود کش حملے میں استعمال کیا جانے والا بارودی مواد گاڑی کے ذریعے پولیس لائنز منتقل کیا گیا ہے۔تحقیقاتی ٹیموں نے پولیس لائنز گیٹ اور خیبرروڈ کی وڈیوز کا جائزہ لیا ہے۔

پشاور پولیس کے مطابق جس روز مسجد میں دھماکا ہوا، اس روز 140 افراد پولیس لائنز میں داخل ہوئے۔ پولیس لائنزبیرک میں موجود تمام افراد کی پرو فائلنگ بھی کی جارہی ہے۔

آئی جی خیبرپختونخوا معظم جاہ انصاری نے میڈیا سے گفتگو کے دوران میں اعتراف کیا کہ علاقے میں سیکیورٹی لیپس ہوا ہے، ایسا کیوں ہوا ہے، اس کا پتہ چلانے کے لیے بھی تحقیقات جاری ہیں۔ انھوں نے کہا کہ خود کش حملہ آور کے سہولت کاروں کا بھی پتا لگا نے کی کوشش کررہے ہیں، جے آئی ٹی کی تحقیقات میں سب کچھ واضح ہوجائے گا۔

انھوں نے مزیدکہا کہ پولیس لائنز میں فیملی کوارٹرز بھی ہیں جہاں پولیس اہل کار اپنے خاندانوں کے ساتھ رہتے ہیں، ان اہلکاروں کے مہمانوں کی آمد ورفت بھی رہتی ہے، پولیس لائنز کے اندر کھانے پینے کی کینٹینیں بھی ہیں، اس کے علاوہ وہاں تعمیراتی کام بھی چل رہا تھا۔

آئی جی کے مطابق خود کش دہشت گرد پیر کو ہی بارودی جیکٹ پہن کر پولیس لائنز اور پھر مسجد میں نہیں داخل ہوا بلکہ بارودی سامان اور جیکٹ وغیرہ تھوڑا تھوڑا کر کے یہاں لاتا رہا‘ خودکش دہشت گرد سائلین یا مہمانوں کے روپ میں داخل ہوا‘ اس حوالے سے سیکیورٹی کی ناکامی کے لیے تحقیقات کی جا رہی ہیں۔

میڈیا نے سی سی پی او پشاور محمد اعجاز خان کے حوالے سے بتایاہے کہ ممکن ہے خود کش دہشت گرد کسی سرکاری گاڑی میں بیٹھ کر پولیس لائنز کے اندر آیا ہو۔ یہ بھی ہوسکتا ہے کہ حملہ آور پہلے سے ہی پولیس لائنز میں موجود ہو، سی ٹی ڈی تمام پہلوؤں پر تفتیش کر رہی ہے۔

وزیر اعظم شہباز شریف نے تمام سیاسی قوتوں کو پیغام دیا ہے کہ پاکستان دشمنوں کے خلاف متحد ہوں۔ ہم اپنے سیاسی جھگڑے بعد میں نبٹا لیں گے۔ دہشت گرد اپنے مذموم مقاصدکے ذریعے عوام میں خوف و ہراس پھیلانا اور دہشت گردی، عسکریت پسندی کے خلاف ہماری محنت سے حاصل کردہ کامیابیوں کو رائیگاں کرنا چاہتے ہیں۔

ایک ٹویٹ میں انھوں نے کہا کہ تمام سیاسی قوتوں کو میرا پیغام پاکستان دشمن عناصر کے خلاف اتحاد کا ہے، ہم اپنی سیاسی لڑائی بعد میں لڑ سکتے ہیں۔

پاک فوج کے سربراہ جنرل سید عاصم منیر نے کہا کہ غیر اخلاقی اور بزدلانہ کارروائیاں قوم کے عزم کو متزلزل نہیں کر سکتیں،یہ کارروائیاں دہشت گردی کے خلاف جاری جنگ میں کامیابی کے لیے ہمارے عزم کو تقویت دیتی ہیں، کسی بھی دہشت گرد کے لیے زیرو ٹالرنس ہے۔

آئی ایس پی آر کے مطابق جی ایچ کیو میں 255 ویں کور کمانڈرز کانفرنس ہوئی جس کی صدارت چیف آف آرمی اسٹاف جنرل سید عاصم منیر نے کی، شرکا کو موجودہ اور ابھرتے ہوئے خطرات، مقبوضہ جموں کشمیر کی صورت حال،دہشت گردوں کے گٹھ جوڑ اور حمایتی میکنزم توڑنے کے لیے فوج اور قانون نافذ کرنے والے اداروں کی جانب سے جاری انٹیلی جنس پر مبنی آپریشنز کے بارے میں تفصیل سے آگاہ کیا گیا۔

آرمی چیف نے تمام کمانڈرز کو ہدایت کی کہ وہ انٹیلی جنس اور قانون نافذ کرنے والے اداروں کے ساتھ مل کر انسداد دہشت گردی کی کارروائیوں پر اس وقت تک توجہ مرکوز رکھیں جب تک ہم پائیدار امن حاصل نہ کر لیں۔

قومی اسمبلی کے اجلاس میں بھی سانحہ پشاور زیر بحث رہا، وزیر دفاع خواجہ آصف نے قومی اسمبلی سے خطاب کرتے ہوئے کہا دہشت گردوں کے خلاف ضرب عضب جیسے آپریشن کی ضرورت ہے تاہم اس کا فیصلہ قومی سلامتی کمیٹی کرے گی کیونکہ قومی سلامتی کمیٹی ہی ایسے فیصلے لینے کا مجاز فورم ہے۔

وزیر دفاع نے کہا کہ 100 افراد کی شہادت، سانحہ آرمی پبلک اسکول سے کم نہیں ہے۔ اے پی ایس سانحہ کے وقت بھی تمام سیاستدان اکٹھے ہوئے تھے ، آج بھی اتفاق رائے چاہیے، ماضی کی غلطیوں کا اعتراف بھی کرنا چاہیے۔انھوں نے انکشاف کیا کہ ساڑھے چار لاکھ افغانی قانونی دستاویزات پر پاکستان آئے اور واپس نہیں گئے، معلوم نہیں ان میں سے کون معصوم شہری ہے اور کون دہشت گرد ہے۔

وفاقی وزیر داخلہ رانا ثناء اللہ نے بھی اس موقع پر اپنے خطاب میںکہا ہم نے ہر قیمت پر دہشت گردی کے خلاف جنگ جیتنی ہے۔ پالیسی تو پارلیمنٹ نے دینی ہے، وزیر اعظم، آرمی چیف، ڈی جی آئی ایس آئی بھی ایوان میں آئیں گے۔ پہلے کی طرح پارلیمنٹیرینز کو بریفنگ دی جائے گی، ہماری پالیسی آج بھی اے پی ایس سانحے کے بعد والی ہے۔ ٹی ٹی پی کے خراسانی گروپ نے اس دہشت گردی کی ذمے داری قبول کی ہے۔

پولیس لائنز کے اندر خودکش بمبار کیسے پہنچا؟ کس نے پہنچایا؟ قانون نافذ کرنے والے ادارے کافی قریب ہیں۔انھوں نے واضح کیا کہ کالعدم تنظیم کے لوگوں کو معاف کردینے کی سرکاری پالیسی غلط ثابت ہوئی ہے، پی ٹی آئی حکومت میں سزائے موت کے مجرم بھی چھوڑے گئے ہیں۔

افغانستان میں طالبان کے اقتدار کے بعد پاکستان کے شمال مغربی علاقوں میں دہشت گردی کی وارداتوں میں بھی اضافہ ہوا ہے اور اس کے ساتھ ساتھ طالبان سیکیورٹی اہلکاروں کی جانب سے سرحدی خلاف ورزیاں بھی ہوئی ہیں۔

پاکستان کے اعلیٰ پالیسی ساز حلقوں میں تو شاید اس قسم کی صورت حال پیدا ہونے کے امکانات کا پتہ ہو لیکن یہ سب کچھ ملک کی اکثریت کی توقعات اور امیدوں کے برعکس تھا کیونکہ پاکستان میں ایک مخصوص مائنڈ سیٹ کا حامل طبقہ عوام کو یہ یقین دہانی کرا رہا تھا کہ افغانستان میں طالبان حکومت کا قیام پاکستان کے لیے غیرمعمولی فوائد کا باعث ہوگا۔

پاکستان کے اندر یہ مخصوص مائنڈ سیٹ علمی سطح پر بھی یہی تاثر پھیلا رہا تھا کہ افغان طالبان نے امریکا کو شکست دے کر اقتدار حاصل کیا ہے حالانکہ طالبان کا اقتدار دوحہ معاہدے کے نتیجے میں قائم ہوا تھا‘ بہرحال سابق حکومت کے وزیراعظم اور ان کے ساتھیوں نے عالمی سطح پر افغانستان کی طالبان حکومت کامقدمہ لڑنا شروع کر دیا۔

ادھر امریکا اور دیگر ممالک افغان طالبان کے عملی اقدامات پر نظر رکھے ہوئے تھے۔طالبان حکومت نے دوحہ میںجو معاہدہ کیا تھا‘ اس کی بعض شرائط پر عمل نہیں کیا‘ جس کے نتیجے میں طالبان حکومت کو دنیا میں کسی ملک نے تسلیم نہیں کیا‘ لیکن پاکستان میں موجودمخصوص مائنڈ سیٹ طالبان کا ساتھ دیتا رہا جب کہ اس کے برعکس افغانستان کی طالبان حکومت نے سرد خانے میں پڑے ہوئے معاملات کو ازسرنو اٹھانا شروع کردیا۔

ڈیورنڈ لائن جو انٹرنیشنلی تسلیم شدہ سرحد ہے‘ اسے متنازعہ بنانے کا کام شروع کردیا‘ پاکستان نے اپنی سرحد کے اندر آہنی باڑ نصب کی تھی‘ اس کی تعمیر پر اشرف غنی کی حکومت نے بھی گرین سگنل دیاتھا لیکن افغان طالبان نے اس سرحدی باڑ کو کئی جگہ سے اکھاڑنے کی کوشش کی‘ اس کے ساتھ ساتھ افغان طالبان کی حکومت نے افغانستان میں موجودٹی ٹی پی کے لوگوں کو نقل و حرکت کی پہلے سے بھی زیادہ اجازت دے دی اور اشرف غنی حکومت نے ٹی ٹی پی کے جن لوگوں کو گرفتار کیا تھا انھیں جیلوں سے رہا کر دیا۔

ٹی ٹی پی کے سرکردہ لوگ جو زیرزمین تھے وہ منظرعام پر آ گئے‘ افغان طالبان نے پاکستان کے مطالبات کے باوجود انھیں نہ پاکستان کے حوالے کیا اور نہ ہی ان کے خلاف کوئی خود ایکشن کیا‘ ادھر پاکستان کی سابق حکومت کے دور میں کالعدم ٹی ٹی پی کے لوگ پاکستان میں آنا شروع ہوئے‘ حکومت نے آنکھیں بند رکھیں ‘اس کوتاہی بلکہ عاقبت نااندیشی کا نتیجہ آج ایک بار پھر دہشت گردی کی شکل میں سامنے آ گیا ہے۔ اب وقت آ گیا ہے کہ پاکستان میں دہشت گردوں کے خلاف کثیرالجہتی آپریشن شروع کیا جائے۔

پولیس لائن پشاور پولیس کا ہیڈکوارٹر ہے جہاں سے پولیس کو کنٹرول کیا جاتا ہے۔ پولیس کی تقرریاں و تبادلے، نفری کی تعیناتی پولیس لائن سے کی جاتی ہے۔ اس کے اردگرد انتہائی حساس مقامات ہیں۔ سول سیکریٹریٹ، کچھ ہی فاصلے پر وزیراعلیٰ ہاؤس، سینٹرل پولیس آفس اور گورنر ہاؤس ہیں۔

انتہائی حساس علاقے میں قائم مسجد میں دہشت گردی کا واقعہ سیکیورٹی اداروں کی کارکردگی پر سوالیہ نشان ہے۔ پولیس لائن پشاور جیسے انتہائی حساس علاقے میں، جہاں ایک عام شہری کا داخلہ بھی ناممکن ہو، وہاں تک دہشتگردوں کی رسائی کیسے ممکن ہوئی؟

دہشت گردوں نے ملک سعد شہید کے نام سے منسوب پولیس لائن پشاور کو پیر کے دن نماز ظہر کے وقت دہشت گردی کا نشانہ بنایا۔ جب یہ سطور لکھی جارہی تھیں اس وقت تک 92 افراد کی شہادت اور 150 زخمیوں کی اطلاعات تھیں۔ دھماکے کے 20 گھنٹے گزر جانے کے باوجود ریسکیو آپریشن جاری تھا۔

پولیس لائن دھماکے کے بعد بہت سے سوالات نے جنم لیا ہے اور قانون نافذ کرنے والے اداروں، حکومت اور ہر شہری کے ذہن میں ایک ہی سوال اٹھ رہا ہے کہ دہشت گردوں کی رسائی پولیس لائن تک کیسے ممکن ہوئی؟ جب ہم نے 1997 میں صحافت شروع کی تھی تو اس وقت کرائم رپورٹنگ کا شوق تھا۔ اس وقت جرائم کی خبروں کے لیے پولیس لائن آنا جانا لگا رہتا تھا لیکن اس وقت دہشت گردی کا ناسور ہماری اس دھرتی پر نہیں ہوا کرتا تھا۔ تب بھی صحافی ہوتے ہوئے پولیس لائن میں پوچھ گچھ کے بعد بغیر تعارف کے چھوڑا نہیں جاتا تھا۔ ابھی بھی پولیس لائن کسی کام سے جانے کےلیے پہلے سے پولیس لائن کے پی آر او کو آگاہ جاتا ہے کہ ضروری کام کےلیے آنا چاہتے ہیں، وہ گیٹ پر بتادیں۔ تب کہیں جاکر رسائی ممکن ہوتی ہے۔

2007 میں دہشت گردی کے واقعات کے بعد پولیس لائن کی سیکیورٹی مزید سخت کردی گئی تھی۔ پولیس افسران کے علاوہ کسی کو بھی پولیس لائن کے مرکزی گیٹ سے اندر جانے پر پابندی لگادی گئی۔ کسی کام کےلیے جانے پر مکمل پوچھ گچھ کے بعد ہی چھوڑا جاتا تھا۔ پولیس لائن تک رسائی کےلیے تین سیکیورٹی حصار سے گزرنا پڑتا تھا لیکن جب دہشت گردی کی وارداتوں میں کمی ہوئی تب سے پولیس لائن جانے والے راستوں پر سیکیورٹی پہلی جیسی نہیں رہی۔ لیکن ابھی بھی پولیس لائن کے مرکزی گیٹ سے گزر کر جانا عام آدمی کےلیے ممکن نہیں۔ دہشت گردی کا حالیہ واقعہ سوچنے پر مجبور کردیتا ہے۔

جب وزیراعظم کو دھماکے کے حوالے سے بریفنگ دی گئی تو اس وقت شہباز شریف نے بھی سوال اٹھایا کہ پولیس لائن کا ایک گیٹ ہونے کے باوجود دہشت گرد کیسے پولیس لائن میں داخل ہوئے؟ اس وقت آئی جی خیبرپختونخوا بھی تحقیقات سے قبل جواب دینے سے قاصر تھے۔

دھماکے کی تحقیقات کےلیے ٹیمیں تشکیل دی گئی ہیں، جنہوں نے مختلف زاویوں سے تحقیقات کا آغاز کردیا ہے۔ ابتدائی رپورٹ بھی تیار کرلی گئی ہے جس کے مطابق دھماکا خودکش تھا اور حملہ آور نے پہلی صف میں خود کو دھماکے سے اڑایا۔ دھماکا اس قدر شدید تھا کہ مسجد کی چھت منہدم ہوگئی اور چھت تلے کئی پولیس اہلکار اور نماز کےلیے آئے شہری دب گئے۔ منہدم چھت تلے زخمیوں کو نکالنے کےلیے صبح تک ریسکیو آپریشن جاری رہا۔

پولیس لائن دھماکے سے قبل دہشت گردی کے اِکا دُکا واقعات کا سلسلہ شروع ہوچکا تھا۔ پشاور کے نواحی علاقوں میں پولیس چوکیوں اور گشت پر پولیس ہلکاروں کو نشانہ بنایا گیا۔ کافی عرصے بعد سانحہ پولیس لائن دہشت گردی کی بڑی واردات ہے۔ عوامی نیشنل پارٹی کے صوبائی صدر ایمل ولی خان نے چند ماہ قبل حکومت کو آگاہ کیا تھا کہ دہشت گرد دوبارہ منظم ہورہے ہیں۔ سوات سمیت خیبرپختونخوا کے مختلف علاقوں اور قبائلی اضلاع میں بھی عوام نے امن مارچ کیا اور دہشت گردوں کا پیغام دیا کہ وہ اپنی سرزمین کو دہشت گردی کےلیے استعمال ہونے نہیں دیں گے لیکن دہشت گرد مذموم کارروائیوں میں مصروف ہیں۔

پولیس لائن پشاور کے دھماکے کی تحقیقات ہوگی، اس کی رپورٹ بھی آئے گی لیکن قانون نافذ کرنے والے اداروں اور حکومت کو جاگنا ہوگا۔ پشاور پولیس لائن کا دھماکا یقیناً سیکیورٹی غفلت ہے۔ سیکیورٹی کے اتنے بڑے حصار سے اور حساس مقام کے اندر ٹارگٹ تک پہنچنا غفلت کے سوا کچھ نہیں۔ سیکیورٹی کا ازسر نو جائزہ لینا ہوگا۔ مزید خون بہانے والوں کا ہاتھ روکنا ہوگا۔ موجودہ حکومت کو بھی یہ دیکھنا ہوگا کہ دہشت گردی کے تانے بانے کہاں ملتے ہیں۔ اگر سرحد پار سے یہ ہورہا ہے تو اس کا بھی جواب دینا ہوگا۔

کب تک مائیں اپنے بیٹوں، بہنیں اپنے بھائیوں کی میتوں پر آنسو بہائیں گی؟ کب تک باپ اپنے بیٹوں اور بھائی اپنے بھائیوں کا جنازہ اٹھائیں گے؟ کب تک چھوٹے بچے اپنے باپ کی میت کو دیکھ کر کہیں گے بابا کب آؤ گے؟ پشاور پولیس لائن دھماکے کے بعد چوکنا رہنا ہوگا۔ دہشت گردی کی جو نئی لہر شروع ہوئی ہے اور پولیس لائن جیسے حساس مقام کو دہشت گرد نشانہ بنانے میں کامیاب ہوئے اس پر ہمیں آنکھیں بند نہیں کرنا ہوں گی۔۔