بھارت کے سپر اسٹار الو ارجن کے گھر پر عثمانیہ یونیورسٹی کے طلبا کا حملہ

بھارت کی تیلگو فلم انڈسٹری کے مشہور اداکار الو ارجن کے گھر پر عثمانیہ یونیورسٹی کے طلبا نے حملہ کیا۔ حملہ آوروں نے چند دن قبل الو ارجن کی فلم ‘پشپا 2’ کے پریمیئر کے دوران سینڈھیا تھیٹر میں بھگدڑ کے نتیجے میں جاں بحق ہونے والی خاتون کے اہل خانہ کے لیے ایک کروڑ روپے معاوضہ کا مطالبہ کیا تھا۔

حملہ آوروں نے الو ارجن کے گھر میں زبردستی داخل ہونے کی کوشش کی اور گھر کے احاطے میں موجود گملے توڑ ڈالے اور ٹماٹر پھینکے۔ عینی شاہدین کے مطابق، حملہ آوروں نے بینرز اٹھا رکھے تھے اور “انصاف ہونا چاہیے” کے نعرے لگا رہے تھے۔

حملے کی اطلاع ملتے ہی حیدرآباد پولیس نے فوری کارروائی کی اور موقع پر پہنچ کر 8 افراد کو گرفتار کر لیا۔ ابتدائی تحقیقات میں خدشہ ظاہر کیا جا رہا ہے کہ عثمانیہ یونیورسٹی کے جوائنٹ ایکشن کمیٹی (OU JAC) کے اراکین اس حملے میں ملوث ہو سکتے ہیں۔

اس واقعے سے کچھ دیر قبل، الو ارجن نے اپنے سوشل میڈیا اکاؤنٹ پر مداحوں سے درخواست کی تھی کہ وہ جذبات کا اظہار ذمے داری کے ساتھ کریں اور کسی قسم کی بدتمیزی یا گالی گلوچ سے گریز کریں۔ اس کے علاوہ، الو ارجن نے اعلان کیا تھا کہ وہ جاں بحق ہونے والی خاتون کے اہل خانہ کو 25 لاکھ روپے کا معاوضہ دیں گے اور زخمیوں کے علاج کے اخراجات بھی خود اٹھائیں گے۔