امریکا کے سابق صدر جمی کارٹر 100 برس کی عمر میں انتقال کر گئے

امریکا کے 39 ویں صدر جمی کارٹر 100 برس کی عمر میں انتقال کر گئے۔ ان کا انتقال 29 دسمبر اتوار کی دوپہر ریاست جارجیا میں اپنے گھر پر ہوا۔ جمی کارٹر کا تعلق ڈیموکریٹک پارٹی سے تھا اور انہوں نے 1977 سے 1981 تک امریکا کے صدر کے طور پر خدمات انجام دیں۔

جمی کارٹر کو اپنے دورِ صدارت میں کئی چیلنجز کا سامنا تھا جن میں خراب معیشت اور ایران یرغمالی بحران شامل تھے۔ تاہم، ان کی سب سے نمایاں کامیابی اسرائیل اور مصر کے درمیان امن معاہدے کی ثالثی تھی، جس کے لیے انہیں 2002 میں نوبیل امن انعام سے نوازا گیا۔ جمی کارٹر امریکا کے پہلے صدر تھے جنہوں نے 100 سال کی عمر پائی۔

جمی کارٹر کی زندگی پر نظر ڈالیں تو وہ یکم اکتوبر 1924 کو جارجیا کے شہر پلینز میں پیدا ہوئے۔ انہوں نے اپنا بچپن جارجیا کے شہر آرچری میں گزارا اور 1946 میں امریکی نیول اکیڈمی سے گریجویشن کی۔ اس کے بعد انہوں نے امریکی بحریہ میں خدمات انجام دیں اور ایک آبدوز کا حصہ بنے۔

ریٹائرمنٹ کے بعد جمی کارٹر نے سیاست میں قدم رکھا، جہاں انہوں نے ریاست جارجیا کی قانون ساز اسمبلی کی نشست جیتی اور پھر 1971 میں ریاست جارجیا کے گورنر منتخب ہوئے۔ 1976 میں انہوں نے صدارتی انتخاب میں حصہ لیا اور کامیاب ہو گئے، جس کے بعد انہوں نے امریکا کے صدر کے طور پر خدمات شروع کیں۔

امریکی صدر جو بائیڈن نے جمی کارٹر کی سرکاری اعزاز کے ساتھ تدفین کا اعلان کیا ہے۔ جمی کارٹر کی وفات پر دنیا بھر میں غم کی لہر دوڑ گئی ہے اور ان کی خدمات کو یاد کیا جا رہا ہے۔