پاکستان کی وفاقی کابینہ نے سعودی عرب کو ریکوڈک منصوبے کے 15 فیصد شیئرز فروخت کرنے کی منظوری دے دی ہے۔ اس حوالے سے ہونے والی پیش رفت میں سعودی عرب کو 540 ملین ڈالرز میں یہ شیئرز فروخت کرنے کا فیصلہ کیا گیا ہے، جو کہ بین الحکومتی ٹرانزیکشن ایکٹ کے تحت براہ راست کیے جائیں گے۔
مذکورہ شیئرز کی فروخت دو مرحلوں میں ہوگی۔ پہلے مرحلے میں 10 فیصد شیئرز کی منتقلی کے بدلے سعودی عرب پاکستان کو 330 ملین ڈالرز ادا کرے گا، جبکہ دوسرے مرحلے میں 5 فیصد شیئرز کی منتقلی پر 210 ملین ڈالرز کی ادائیگی کی جائے گی۔ اس معاہدے سے سعودی عرب کا پاکستان کے ساتھ اقتصادی تعلقات مزید مستحکم ہوگا اور دونوں ممالک کی پارٹنرشپ کی نوعیت میں مزید اضافہ ہوگا۔
علاوہ ازیں، سعودی فنڈ برائے ترقی بلوچستان میں معدنیات کی ترقی کے لیے 150 ملین ڈالرز کی امداد فراہم کرے گا۔ سعودی عرب نے چاغی میں بھی معدنیات کی تلاش کے لیے سرمایہ کاری کی دلچسپی ظاہر کی ہے۔ وفاقی اور بلوچستان حکومتوں کے پاس ریکوڈک منصوبے کے 50 فیصد شیئرز کی ملکیت ہے، جس میں سعودی عرب کا شامل ہونا پاکستان کے لیے ایک اہم معاشی قدم ثابت ہو سکتا ہے۔
اس معاہدے سے نہ صرف پاکستان کو مالی فوائد حاصل ہوں گے بلکہ سعودی عرب کے ساتھ طویل المدتی اقتصادی تعلقات بھی استوار ہوں گے۔ ریکوڈک منصوبہ بلوچستان میں واقع ایک اہم معدنیات کا ذخیرہ ہے، جس میں سونے اور تانبے کی بڑی مقدار موجود ہے، اور اس معاہدے سے دونوں ممالک کے لیے اقتصادی مواقع میں اضافہ ہونے کا امکان ہے۔
Leave a Reply