جنوبی کوریا میں طیارہ حادثے میں تین سالہ بچے کی آخری تصویر سوشل میڈیا پر وائرل

جنوبی کوریا میں ایک دل دہلا دینے والے طیارہ حادثے میں 43 سالہ کانگ کو، 37 سالہ جِن لی سیون اور ان کے تین سالہ بچے کی جان چلی گئی۔ یہ حادثہ اس وقت پیش آیا جب ان کا طیارہ لینڈنگ کے دوران تباہ ہوگیا۔ حادثے سے کچھ گھنٹے قبل، کانگ کو اور ان کی بیوی نے انسٹاگرام پر اپنے سفر کی تصاویر شیئر کی تھیں، جن میں ان کا تین سالہ بیٹا پہلی بار کرسمس منانے کے لیے بیرون ملک جا رہا تھا۔

کانگ کو نے اپنے بیٹے کی ایک تصویر شیئر کی تھی جس میں بچہ جہاز کی کھڑکی سے باہر دیکھ رہا تھا۔ تصویر کے ساتھ انہوں نے کیپشن میں لکھا، “میرا بیٹا پہلی بار رات کی فلائٹ میں بیرون ملک جا رہا ہے، اور اس کے پہلے پاسپورٹ پر کوئی مہر نہیں ہے!” یہ تصویر اب سوشل میڈیا پر وائرل ہو چکی ہے، اور صارفین اس افسوسناک حادثے پر اظہار افسوس کر رہے ہیں۔

طیارے کے حادثے میں 179 افراد کی ہلاکت ہوئی، جبکہ 2 افراد بچ نکلنے میں کامیاب ہوئے۔ جنوبی کوریا کی قومی ائیر لائن نے اس حادثے کی وجوہات ابھی تک غیر واضح بتائی ہیں۔ کمپنی کے سی ای او نے کہا کہ طیارے کی خرابی کے کوئی ابتدائی شواہد نہیں ملے، اور حادثے کا کوئی سابقہ ریکارڈ بھی نہیں تھا۔ طیارہ حادثے پر انہوں نے معذرت بھی کی ہے۔

یہ حادثہ نہ صرف ایک خاندان کے لیے غم کا سبب بنا بلکہ اس نے دنیا بھر میں لوگوں کو متاثر کیا، خاص طور پر تین سالہ بچے کی معصومیت کی آخری تصویر نے دلوں کو جھنجھوڑ دیا۔