امریکی سفیر ڈونلڈ بلوم نے پاکستان میں اپنی سفارتی خدمات مکمل کرنے کے بعد الوداعی پیغام جاری کیا، جس میں انہوں نے اپنے تین سالہ دوران تعیناتی کو ایک کامیاب اور یادگار تجربہ قرار دیا۔ سفیر بلوم نے کہا کہ پاکستان میں اپنے دورے کے دوران انہوں نے پاکستانی دوستوں کے ساتھ شراکت داری کے نئے باب کا آغاز کیا اور ایک ساتھ بڑے چیلنجز کا مقابلہ کیا۔
ڈونلڈ بلوم نے اپنے پیغام میں کورونا وائرس، 2022 کے تباہ کن سیلاب، اور لاکھوں افراد کی بحالی کے عمل میں مدد فراہم کرنے جیسے چیلنجز کا ذکر کیا۔ انہوں نے کہا کہ ہم نے ان چیلنجز کا مل کر مقابلہ کیا، روزگار کے نئے مواقع پیدا کیے، اور معیاری صحت و تعلیم کی سہولتیں فراہم کیں جس سے لوگوں کا معیار زندگی بہتر ہوا۔
انہوں نے اپنے وقت کو مزید خوشگوار اور پرلطف قرار دیتے ہوئے کہا کہ پاکستان میں چائے پر گپ شپ، قوالی کے فن کے مظاہرے، اور کرکٹ کھیلنے جیسے تجربات ہمیشہ یادگار رہیں گے۔ سفیر بلوم نے کہا کہ پاکستان کے ہر علاقے میں انہیں مہمان نوازی کا سامنا کرنا پڑا، اور لاہور کے تاریخی شہر میں ثقافت و روایت کو گہرائی سے محسوس کیا۔
انہوں نے کہا کہ پاکستان کے کسانوں کے ساتھ پنجاب کے زرخیز میدانوں میں چہل قدمی کے دوران وہ پاکستان کے قدرتی وسائل اور زراعت کے شعبے میں ہونے والی ترقی سے بہت متاثر ہوئے۔
ڈونلڈ بلوم نے اپنے الوداعی پیغام میں کراچی کو کاروبار کے لیے اہم شہر قرار دیا اور کہا کہ یہ شہر پاکستان کے معاشی مستقبل کے لیے اہم کردار ادا کرتا ہے۔ انہوں نے کہا کہ پاکستان قرضوں اور انحصاری سے آزادی کی جانب گامزن ہے، اور دونوں ممالک کی تجارت و سرمایہ کاری میں اضافہ اس بات کا غماز ہے کہ ہم ایک روشن اور خوشحال مستقبل کی تشکیل کی طرف بڑھ رہے ہیں۔
امریکی سفیر ڈونلڈ بلوم کل اپنی سفارتی خدمات مکمل کرکے امریکہ واپس روانہ ہو جائیں گے۔
Leave a Reply