ایرانی مسلح افواج کے چیف آف جنرل اسٹاف کی صدر آصف علی زرداری سے ملاقات

اسلام آباد:ایرانی مسلح افواج کے چیف آف جنرل اسٹاف، میجر جنرل ڈاکٹر محمد باقری نے ایوانِ صدر میں صدر آصف علی زرداری سے ملاقات کی۔ ملاقات میں دو طرفہ اہم امور پر تبادلہ خیال کیا گیا۔ملاقات کے دوران دونوں رہنماؤں نے پاکستان اور ایران کے دیرینہ اور برادرانہ تعلقات کو اجاگر کرتے ہوئے تجارتی اور اقتصادی تعلقات کو فروغ دینے کی ضرورت پر زور دیا تاکہ دونوں ممالک کے عوام کو فائدہ پہنچ سکے۔اس موقع پر دہشت گردی کو مشترکہ چیلنج قرار دیتے ہوئے اس کے خاتمے کے لیے مؤثر اور مربوط اقدامات کی اہمیت پر بھی تبادلہ خیال کیا گیا۔ایرانی چیف آف جنرل اسٹاف نے غزہ اور لبنان کے حوالے سے پاکستان کے مؤقف کو سراہا۔یہ ملاقات پاکستان اور ایران کے تعلقات کو مزید مضبوط بنانے کی ایک کڑی قرار دی جا رہی ہے۔