حکومت اور پی ٹی آئی مذاکرات: 28 جنوری کو اگلے اجلاس کا فیصلہ

اسلام آباد: حکومت اور پی ٹی آئی کے درمیان جاری مذاکرات کے سلسلے میں دونوں مذاکراتی کمیٹیوں نے اگلا اجلاس 28 جنوری کو بلانے کا فیصلہ کیا ہے۔ ذرائع کے مطابق اجلاس میں پی ٹی آئی کے مطالبات کا تفصیلی جائزہ لیا گیا۔ اس دوران حکومتی مذاکراتی کمیٹی کو جوڈیشل کمیشن کی تشکیل سے متعلق بریفنگ دی گئی، تاہم کمیٹی کے بعض ارکان نے جوڈیشل کمیشن کی تشکیل کی مخالفت کی۔حکومتی مذاکراتی کمیٹی کے ارکان کا اجلاس اسپیکر چیمبر میں منعقد ہوا۔ اجلاس کے بعد کمیٹی کے ترجمان عرفان صدیقی نے میڈیا سے گفتگو کرتے ہوئے بتایا کہ ہمارا اجلاس کل اور اگلے دن بھی جاری رہے گا اور کام مکمل ہونے کے بعد عوام کو آگاہ کیا جائے گا۔ انہوں نے مزید کہا کہ اجلاس میں تمام سات حکومتی جماعتوں کے نمائندے موجود تھے اور مذاکرات کے معاملات پر تفصیلی بحث کی گئی۔عرفان صدیقی نے وضاحت کی کہ لیگل کمیٹی نے ابھی تک کوئی حتمی رائے نہیں دی، تاہم پی ٹی آئی کے مطالبات کا جائزہ لیا جا رہا ہے۔ انہوں نے یقین دہانی کرائی کہ مذاکراتی کمیٹی کا چوتھا دور انشاءاللہ مکمل ہوگا اور اس حوالے سے تمام پہلوؤں کو مدنظر رکھا جائے گا۔اجلاس کے بعد حکومتی کمیٹی کے رکن فاروق ستار نے کہا کہ اجلاس میں کیا گفتگو ہوئی، اس بارے میں میڈیا پر تفصیلات شیئر کرنا مذاکرات کی پیشرفت کے لیے مناسب نہیں۔ ان کا کہنا تھا کہ مذاکرات کو آگے بڑھانے کے لیے سنجیدگی ضروری ہے اور حکومتی ٹیم چوتھے دور کی تیاری کر رہی ہے۔رانا ثناءاللہ نے بھی میڈیا سے گفتگو کی اور بتایا کہ ایک ذیلی کمیٹی تشکیل دی گئی ہے جو پی ٹی آئی کے چارٹر آف ڈیمانڈ کا جائزہ لے رہی ہے۔ انہوں نے کہا کہ اپوزیشن کے ساتھ آئندہ مذاکرات میں پی ٹی آئی کے مطالبات پر واضح موقف پیش کیا جائے گا۔ صحافی کے سوال پر کہ اگر سات دن میں جوڈیشل کمیشن تشکیل نہ دیا گیا تو مذاکرات ختم ہو سکتے ہیں، رانا ثناءاللہ نے کہا کہ حکومت اپنے جواب کو تحریری شکل میں پی ٹی آئی کو دے گی۔ جوڈیشل کمیشن تشکیل دینے یا نہ دینے کا فیصلہ تحریری جواب کے ذریعے واضح ہوگا۔اجلاس کے دوران حکومت نے مذاکرات کو سنجیدہ انداز میں جاری رکھنے اور پی ٹی آئی کے مطالبات پر عملی اقدامات اٹھانے کی یقین دہانی کرائی۔