غیرملکی سرمایہ کاروں کیلئے سازگار ماحول فراہم کررہے ہیں: وزیراعظم

اسلام آباد: وزیرِ اعظم شہباز شریف نے غیر ملکی سرمایہ کاروں کے لیے کاروباری ماحول کو مزید بہتر بنانے، آسان پراسیسز اور مضبوط ادارہ جاتی حمایت فراہم کرنے کے عزم کا اعادہ کیا ہے۔ایک بین الاقوامی سرمایہ کاروں کے وفد سے بات کرتے ہوئے، جس کی قیادت امریکی سرمایہ کار گینٹری بیچ کر رہے تھے، وزیرِ اعظم نے پاکستان کی اسٹرٹیجک جغرافیائی حیثیت، ہنر مند اور نوجوان افرادی قوت اور تیزی سے بڑھتی ہوئی صارف مارکیٹ کو اجاگر کیا۔ انہوں نے ملک کی عالمی سطح پر سرمایہ کاری کے لیے منفرد اپیل کو بھی نمایاں کیا۔وزیرِ اعظم نے وفد کے پاکستان میں کاروباری مواقع تلاش کرنے میں گہری دلچسپی پر ان کا شکریہ ادا کیا۔گینٹری بیچ نے پاکستان کی وسیع اقتصادی صلاحیت کی تعریف کی اور اپنے وفد کی جانب سے کان کنی، معدنیات، قابل تجدید توانائی، انفراسٹرکچر کی ترقی اور ٹیکنالوجی جیسے اہم شعبوں میں سرمایہ کاری کے مواقع تلاش کرنے کے عزم کا اظہار کیا۔ انہوں نے حکومت کی سرمایہ دوست پالیسیوں کو سراہا اور ملک کی ترقی کی رفتار پر اعتماد کا اظہار کیا۔