کرم کیلئے ایک اور امدادی قافلہ روانہ ، سکیورٹی کے سخت انتظامات

پشاور: کرم کے لیے 30 سے زائد گاڑیوں پر مشتمل امدادی قافلہ روانہ ہو گیا، قافلے کی سکیورٹی کیلئے سخت انتظامات کے گئے ہیں۔پولیس کے مطابق امدادی قافلہ ہنگو تور پل چیک پوسٹ سے روانہ کیا گیا جبکہ مزید گاڑیاں بھی روانہ کی جا رہی ہیں۔یاد رہے کہ 17 فروری کو لوئر کرم میں امداد لیکر جانے والی گاڑیوں پر حملے کے بعد قافلے روک دیے گئے تھے۔ تاجر برادری کے مطابق 17 فروری کو بڑا قافلہ واپس آنے کے بعد اپر کرم میں کسی قسم کی ترسیل نہیں ہوئی تھی۔ دوسری جانب حقوق کے مطالبے اور سڑکوں کی بندش کے خلاف پاراچنار پریس کلب کے سامنے احتجاجی دھرنا تیسرے روز بھی جاری رہا۔ مظاہرین کا کہنا ہے کہ جب تک مطالبات تسلیم نہیں ہوتے احتجاج جاری رہے گا۔