وزیراعظم شہباز شریف کی زیر صدارت میری ٹائم سیکٹر میں اصلاحات کے حوالے سے اجلاس

اسلام آباد: وزیراعظم محمد شہباز شریف کی زیر صدارت میری ٹائم سیکٹر میں اصلاحات کے حوالے سے اجلاس ہوا، جس میں توانائی کے شعبے میں پائیدار اصلاحات کے لیے بنائی گئی ٹاسک فورس کی کامیابیوں پر روشنی ڈالی گئی۔ وزیراعظم نے کہا کہ توانائی کے شعبے میں اس ٹاسک فورس کی کاوشوں سے بجلی کے نرخوں میں حالیہ کمی ممکن ہوئی۔وزیراعظم نے مزید کہا کہ توانائی کے شعبے کے لیے تشکیل کردہ ٹاسک فورس کی طرز پر میری ٹائم سیکٹر میں بھی پائیدار اصلاحات کے لیے ٹاسک فورس کام کر رہی ہے، تاکہ سمندر سے جڑی اکانومی میں طویل عرصے سے موجود جمود کو ختم کیا جا سکے۔انہوں نے کہا کہ اللہ تعالیٰ نے پاکستان کو طویل ساحل، سمندر اور دیگر لامحدود وسائل عطا کیے ہیں، جن سے فائدہ اٹھاتے ہوئے عالمی معیشت کی ترقی کے لیے سمندری وسائل تک رسائی ضروری ہے۔وزیراعظم نے کہا کہ ملکی بندرگاہوں کو عالمی سطح پر مسابقتی معیار پر لانے کے لیے تجارتی ٹیرف پر نظر ثانی کی جائے گی۔ اس کے ساتھ ساتھ کسٹمز کلیئرنس کے عمل کو مزید تیز کرنے کے لیے گرین چینل کی طرز پر لائحہ عمل تشکیل دینے کی ہدایت کی۔وزیراعظم نے کہا کہ بندرگاہوں پر موجود کنٹینروں کے قیام کے دورانیے کو کم سے کم کرنے کے لیے بھی ایک جامع حکمت عملی تیار کی جائے گی۔