پوری قوم کو اپنے محنت کش سمندرپار پاکستانیوں پر فخر ہے، شہباز شریف

اسلام آباد: وزیر اعظم شہباز شریف نے کہا ہے کہ پوری قوم کو اپنے محنت کش سمندر پار پاکستانیوں پر فخر ہے۔وزیر اعظم شہباز شریف نے ترسیلات زر پہلی مرتبہ ایک ماہ میں 4 ارب ڈالر تک پہنچنے پر اظہار مسرت کیا۔ اور انہوں نے مارچ میں ترسیلات زر 4.1 ارب ڈالر پہنچنے پر سمندر پار پاکستانیوں سے اظہار تشکر کیا۔شہباز شریف نے کہا کہ رواں مالی سال اب تک ترسیلات زر مجموعی طور پر 28 ارب ڈالر تک پہنچ گئیں۔ جبکہ گزشتہ سال کے مقابلے میں ترسیلات زر میں 37.4 فیصد اضافہ ہوا ہے۔انہوں نے کہا کہ ترسیلات اوورسیز پاکستانیوں کی لگن، جذبے اور ملکی معیشت میں اعتماد کا مظہر ہے۔ اور ترسیلات زر کی ریکارڈ سطح اوورسیز پاکستانیوں کے حکومتی پالیسیوں پر اعتماد کی عکاسی ہے۔وزیر اعظم نے کہا کہ اوورسیز پاکستانی دن رات محنت اور لگن سے کام کر کے ملک کا نام روشن کرتے ہیں۔ اور ترسیلات زر سے ملکی معیشت کو فائدہ پہنچاتے ہیں۔ سمندر پار مقیم پاکستانی ہمارا اثاثہ ہیں۔انہوں نے کہا کہ پوری قوم کو اپنے محنت کش سمندر پار پاکستانیوں پر فخر ہے۔ اور حکومت بیرون ملک مقیم پاکستانیوں کو تمام تر سہولیات فراہم کرنے کے لیے پر عزم ہے۔