امریکی قائم مقام سفیرنتالی بیکر کی وزیر داخلہ محسن نقوی سے 48 گھنٹوں میں دوسری ملاقات

اسلام آباد: امریکی قائم مقام سفیر نتالی بیکر نے 48 گھنٹوں کے دوران وفاقی وزیر داخلہ محسن نقوی سے دوسری بار ملاقات کی۔ ملاقات میں پاکستان اور بھارت کے درمیان جاری کشیدگی اور سرحدی صورتحال پر تبادلہ خیال کیا گیا۔وفاقی وزیر داخلہ نے نتالی بیکر کو حالیہ کشیدگی اور اس کے نتیجے میں پیدا ہونے والی صورتحال سے آگاہ کیا۔ انہوں نے بھارت کی جانب سے ڈرون دہشت گردی پر تفصیلی بریفنگ دی اور کہا کہ بھارت نے بین الاقوامی قوانین کی کھلم کھلا خلاف ورزی کرتے ہوئے شہری علاقوں کو نشانہ بنانے کی کوشش کی۔ وزیر داخلہ نے واضح کیا کہ پاکستان نے مؤثر جوابی کارروائی کرتے ہوئے درجنوں بھارتی ڈرون مار گرائے ہیں۔محسن نقوی نے زور دیا کہ اس پورے خطرناک صورتحال کی مکمل ذمہ داری بھارت پر عائد ہوتی ہے اور خطے کو جنگ کے دہانے پر پہنچانے کا ذمے دار بھی وہی ہے۔ انہوں نے کہا کہ پاکستان کی سلامتی اور خودمختاری پر کوئی سمجھوتہ نہیں کیا جائے گا۔اس موقع پر امریکی سیاسی قونصلر زیک ہارکنرائیڈر بھی موجود تھے۔