پاک بھارت جنگ بندی احسن قدم‘دونوں ممالک پائیدار امن کیلئے بات چیت جاری رکھیں: چین

بیجنگ: چین نے حال ہی میں ہونے والے بھارت اور پاکستان کے درمیان جنگ بندی معاہدے کا خیرمقدم کرتے ہوئے اسے خطے میں امن و استحکام کے لیے ایک مثبت پیش رفت قرار دیا ہے۔10 مئی کی شب، چینی وزیر خارجہ اور دفترِ مرکزی خارجہ امور کمیشن کے ڈائریکٹر وانگ یی نے پاکستان کے نائب وزیر اعظم و وزیر خارجہ اسحاق ڈار اور بھارت کے قومی سلامتی کے مشیر شری اجیت دوول سے علیحدہ علیحدہ ٹیلیفونک گفتگو کی۔ ان بات چیت میں وانگ یی نے دونوں فریقین پر زور دیا کہ وہ کشیدگی میں کمی لائیں اور مکمل و دیرپا جنگ بندی کو مستحکم کریں۔چینی وزارت خارجہ نے سماجی رابطے کی ویب سائٹ “ایکس” پر جاری ایک بیان میں کہا،
“ہم امید کرتے ہیں کہ بھارت اور پاکستان جنگ بندی کے اس عمل کو مضبوطی سے جاری رکھیں گے، مزید تصادم سے گریز کریں گے، اختلافات کو بات چیت اور مذاکرات کے ذریعے حل کریں گے، اور سیاسی تصفیے کی راہ پر واپس آئیں گے۔”
چین نے اس عزم کا اعادہ کیا کہ وہ بھارت اور پاکستان کے ساتھ رابطے میں رہے گا اور خطے میں مکمل اور پائیدار جنگ بندی کے قیام اور امن و استحکام کو یقینی بنانے کے لیے تعمیری کردار ادا کرتا رہے گا۔