پی آئی اے کا جشن فتح: تمام پروازوں میں کیک کاٹنے کی تقریب

اسلام آباد: آپریشن بنیان المرصوص میں پاکستان کی تاریخی فتح کے موقع پر قومی ایئرلائن پی آئی اے نے خوشی منانے کا ایک منفرد انداز اختیار کیا ہے۔ ترجمان پی آئی اے کے مطابق تمام ملکی و غیر ملکی پروازوں میں دوران پرواز مسافروں کی خصوصی تواضع کی جارہی ہے۔ترجمان نے بتایا کہ جشن فتح کی مناسبت سے پی آئی اے کی پروازوں میں کیک کاٹنے کی تقریبات شروع کردی گئی ہیں۔ یہ تقریبات نہ صرف اندرون ملک پروازوں بلکہ بین الاقوامی روٹس جیسے ٹورانٹو، فرانس، عرب ممالک اور دیگر بین الاقوامی مقامات پر جانے والی پروازوں میں بھی منعقد کی جارہی ہیں۔پی آئی اے کے اس اقدام کو مسافروں کی جانب سے خوب سراہا جا رہا ہے اور قومی جذبے کے ساتھ مسافروں نے خوشی کا اظہار کیا ہے۔ ترجمان نے مزید کہا کہ قومی ایئرلائن ہمیشہ وطن کی کامیابیوں میں پیش پیش رہی ہے اور اس موقع کو یادگار بنانے کیلئے خصوصی انتظامات کیے گئے ہیں-