وزیرداخلہ کی زیرصدارت وفاقی دارالحکومت میں محرم کے سکیورٹی انتظامات پر اہم اجلاس

اسلام آباد: وفاقی وزیر داخلہ محسن نقوی نے وزارت داخلہ میں محرم کے دوران سیکیورٹی اور دیگر انتظامات سے متعلق ایک اعلیٰ سطحی اجلاس کی صدارت کی۔ اجلاس میں اسلام آباد میں محرم کے دوران سیکیورٹی اور انتظامی اقدامات کا تفصیلی جائزہ لیا گیا۔وزیرداخلہ نے ہدایت کی کہ تمام جلوسوں اور مجالس کے داخلی و خارجی راستوں پر سخت چیکنگ کی جائے۔ سیف سٹی میں ایک مرکزی کنٹرول روم قائم کیا جائے گا اور مجالس و جلوسوں کے تحفظ کے لیے کثیر الجہتی سیکیورٹی تعینات کی جائے گی۔ ایک جامع ٹریفک مینجمنٹ پلان بھی تیار کر لیا گیا ہے۔ تمام امام بارگاہوں، مجالس اور جلوسوں کے راستوں کی جیو ٹیگنگ مکمل کر لی گئی ہے۔ محسن نقوی نے کہا کہ اشتعال انگیز مواد کے خلاف زیرو ٹالرنس پالیسی اپنائی جائے گی اور سوشل میڈیا کی سخت نگرانی کی جائے گی۔ انہوں نے مجالس اور جلوسوں کی نگرانی کے لیے جدید ٹیکنالوجی کے استعمال پر زور دیا۔ انہوں نے ہدایت کی کہ ڈیوٹی پر مامور اہلکاروں کے لیے کھانے پینے کے خصوصی انتظامات یقینی بنائے جائیں۔ انہوں نے مزید کہا کہ اہلکاروں کی تعیناتی مناسب شفٹوں کی بنیاد پر کی جائے تاکہ انہیں آرام کا وقت ملے اور وہ اپنی ڈیوٹی پوری ہوشیاری سے سرانجام دے سکیں۔وزیرداخلہ نے ضابطہ اخلاق پر سختی سے عملدرآمد پر زور دیا اور معاشرے کے تمام طبقات سے اپیل کی کہ وہ محرم کے دوران فرقہ وارانہ ہم آہنگی کو یقینی بنانے میں اپنا کردار ادا کریں۔اجلاس کے دوران ڈپٹی کمشنر اسلام آباد اور ڈی آئی جی اسلام آباد نے بتایا کہ محرم کے دوران اسلام آباد میں 181 جلوس اور 965 مجالس منعقد ہوں گی۔ مزید برآں، تمام مجالس اور جلوسوں کا سیکیورٹی آڈٹ مکمل کر لیا گیا ہے۔اجلاس میں وزیرداخلہ کے معاون خصوصی طلال چوہدری، ایڈیشنل سیکریٹری داخلہ، ڈپٹی کمشنر اسلام آباد، اے ڈی سی (جنرل)، ڈی آئی جیز، تمام ایس پیز اور اسسٹنٹ کمشنرز بھی شریک تھے۔