باجوڑ میں قبائلی مشران کا جرگہ‘ تحریک طالبان پاکستان کی جنگ بندی کیلئے کل تک کی مہلت

پشاور: باجوڑ ڈسٹرکٹ، خیبر پختونخوا میں پاکستانی طالبان نے باجوڑ میں جنگ بندی کی مدت میں ہفتہ (کل) دوپہر 12 بجے تک توسیع مانگ لی ہے۔ یہ پیش رفت ایک قبائلی جرگہ کے بعد سامنے آئی، جو طالبان کو دو مطالبات پر مبنی فیصلہ سنانے گیا تھا۔قبائلی جرگہ کا کہنا ہے کہ یا تو وہ افغانستان واپس جائیں جہاں سے وہ آئے ہیں یا پھر شہری علاقوں کو خالی کریں اورپہاڑوں پر چلے جائیں اور اپنی لڑائی وہاں لڑیں۔ جرگہ کے دو ارکان نے حکام کو اس پیش رفت کی تصدیق کی اور بتایا کہ وہ کل مزید مذاکرات کی توقع رکھتے ہیں، جو دونوں فریقوں کے جواب پر منحصر ہوگی۔ ایک جرگہ رکن نے کہا، “ہم پوری کوشش کریں گے کہ اس تنازع کو خونریزی کے بغیر حل کیا جائے۔آج صبح جرگہ کے قبائلی عمائدین اور علاقے کے منتخب نمائندوں نے آپریشنل ایریا میں پاکستانی طالبان سے بات چیت کی۔ ایک اور جرگہ رکن نے بتایاکہ “انہوں نے ہمیں کہا کہ وہ اپنے عمائدین سے مشاورت کرکے کل تک حتمی فیصلہ کریں گے۔”