اسحاق ڈار کی او آئی سی وزرائے خارجہ اجلاس کے موقع پر سعودی وزیر شہزادہ فیصل سے ملاقات

اسلام آباد(سنگ میل نیوز)نائب وزیراعظم و وزیر خارجہ سینیٹر محمد اسحاق ڈار نے جدہ میں فلسطین کے حوالے سے منعقدہ او آئی سی وزرائے خارجہ کے ہنگامی اجلاس کے موقع پر سعودی عرب کے وزیر خارجہ شہزادہ فیصل بن فرحان سے ملاقات کی۔پیر کو دفتر خارجہ سے جاری بیان کے مطابق ملاقات میں دونوں راہنمائوں نے غزہ میں سنگین انسانی صورتحال پر تبادلہ خیال کیا۔ دونوں راہنمائوں نے فلسطین میں جاری نسل کشی، قحط اور مستقل جنگ بندی کی فوری ضرورت، انسانی امداد تک بلا رکاوٹ رسائی، تعمیر نو اور پائیدار امن کے امور پر بات چیت کی۔اس موقع پر دونوں ممالک کے درمیان باہمی برادرانہ تعلقات کے مختلف پہلوئوں کا بھی جائزہ لیا گیا اور خطے اور دنیا میں باہمی دلچسپی کے اہم معاملات پر تبادلہ خیال کیا۔