بھارتی سکھوں کو پاکستان آنے سے روکنے پر پاکستان سکھ گوردوارہ پربندھک کمیٹی کا سخت ردعمل

ننکانہ صاحب: بھارتی سکھوں کو پاکستان آنے سے روکنے پر پاکستان سکھ گوردوارہ پربندھک کمیٹی نے سخت ردعمل کا اظہار کیا ہے۔پردھان پاکستان سکھ گوردوارہ پربندھک کمیٹی سردار رمیش سنگھ اروڑہ کی زیر صدارت اہم اجلاس ہوا، اجلاس میں بھارتی فیصلے کے خلاف شدید تشویش اور مذمت کا اظہار کیا گیا۔اجلاس میں بھارتی فیصلے کے خلاف متفقہ قرارداد بھی منظور کی گئی۔اس موقع پر رمیش سنگھ اروڑہ نے دیگر کے ہمراہ میڈیا سے گفتگو کرتے ہوئے کہا کہ بھارت کی ہٹ دھرمی عالمی قوانین کی صریح خلاف ورزی ہے، بھارتی حکومت مذہبی رسومات سے روک کر بنیادی انسانی حقوق پامال کر رہی ہے۔سردار رمیش سنگھ اروڑہ نے کہا کہ بھارتی حکومت کا اقدام مذہبی آزادی کی خلاف ورزی ہے، عالمی برادری سکھوں کی مذہبی آزادی سلب کرنے پر بھارت کو جوابدہ بنائے۔انہوں نے کہا کہ ایسے اقدامات سے دنیا بھر کے سکھوں کے جذبات کو ٹھیس پہنچی ہے، سکھ برادری کے لیے پاکستان کے دروازے ہمیشہ کھلے ہیں۔سردار رمیش سنگھ اروڑہ نے کہا کہ بھارتی حکومت اپنے ہی سکھ شہریوں کو بنیادی حق سے محروم کر رہی ہے، پاکستان میں تمام اقلیتوں کو مکمل مذہبی آزادی حاصل ہے۔