ٹی ٹونٹی رینکنگ، ابرار احمدچوتھی پوزیشن پر پہنچ گئے

دبئی :انٹرنیشنل کرکٹ کونسل کی طرف سے تازہ ترین ٹی ٹونٹی پلیئرز رینکنگ جاری کر دی گئی ہے ۔بیٹنگ کے شعبے میں بھارت کے ابھیشک شرما کی پہلی پوزیشن برقرار ہے ،انگلینڈ کے فلپ سالٹ دوسرے جبکہ بھارت کے تلک ورما ایک درجہ بہتری کے بعد تیسری پوزیشن پر پہنچ گئے ہیں۔ پاکستان کے صاحبزادہ فرحان 31 درجے کی لمبی چھلانگ کے بعد 24 ویں نمبر پر پہنچ گئے ہیں جبکہ بابر اعظم 9 درجے تنزلی کے بعد 35 ویں اور صائم ایوب 8 درجہ تنزلی کے بعد 55ویں نمبر پر چلے گئے ۔ باؤلنگ کے شعبے میں بھارت کے ورن چکرورتی کی پہلی پوزیشن پر برقرار ہیں ،نیوزی لینڈ کے جیکب ڈفی دوسرے نمبر پر ہیں ۔ویسٹ انڈیز کے عقیل حسین تیسرے نمبر پر ہیں جبکہ ایشیا کپ میں شاندار کارکردگی کی بدولت قومی سپنر ابرار احمد ٹاپ پوزیشن کے انتہائی قریب پہنچ گئے ہیں، ابرار احمد 12 درجے بہتری کے بعد چوتھے نمبر پر پہنچ گئے ہیں ۔ سفیان مقیم 3 درجہ تنزلی کے بعد 14ویں نمبر پر چلے گئے جبکہ شاہین آفریدی 2 درجہ بہتری کے بعد 25ویں اور حارث رؤف 9 درجہ بہتری کے بعد 28 ویں نمبر پر پہنچ گئے ہیں۔