لبنان: اقوام متحدہ کی امن فوج نے اسرائیلی ڈرون مار گرایا

بیروت: جنوبی لبنان میں تعینات اقوام متحدہ کے امن مشن (یونیفل) کے اہلکاروں نے ایک اسرائیلی ڈرون کو مار گرایا۔یونیفل نے ایک بیان میں کہا کہ اسرائیلی ڈرون نے ان کی ٹیم کے اوپر ’جارحانہ انداز‘ میں پرواز کی، ڈرون کی پرواز کے بعد امن فوج کے اہلکاروں نے ’دفاعی کارروائی کرتے ہوئے ڈرون کو ناکارہ بنا دیا‘۔یونیفل کے مطابق اس واقعے کے فوراً بعد ایک اور اسرائیلی ڈرون نے امن مشن کے قریب گرینیڈ پھینکا جبکہ ایک اسرائیلی ٹینک نے ان کی جانب فائرنگ کی، اس حملے میں امن فوج کا کوئی اہلکار زخمی نہیں ہوا۔دوسری جانب اسرائیلی فوج کے ترجمان نے پیر کے روز کہا کہ ڈرون جنوبی لبنان کے سرحدی قصبے کفرکلا میں اقوام متحدہ کے امن اہلکاروں کے قریب موجود تھا اورمعمول کی پرواز کررہا تھا۔ترجمان کے مطابق اسرائیلی ڈرون نے امن فوج پر کوئی فائرنگ نہیں کی اور ڈرون گرنے کے بعد اسرائیلی فوج نے اس مقام پر ایک دستی بم پھینکا جہاں ڈرون گرا تھا۔