Blog

ابوظہبی/ بیجنگ: ابوظہبی کے ولی عہد شیخ خالد بن محمد بن زاید آل نہیان سرکاری دورے پر آج بیجنگ پہنچ گئے ہیں۔رپورٹ کے مطابق اس دورے کا بنیادی مقصد جامع اسٹریٹجک شراکت داری کو مزید گہرا کرنا اور ترقیاتی و معاشی تعاون کے نئے مواقع تلاش کرنا ہے، یہ دورہ دونوں ممالک کے اس مشترکہ عزم کو ظاہر کرتا ہے جس کے تحت وہ تجارت، سرمایہ کاری اور دیگر اعلیٰ صلاحیت والے شعبوں میں نئی پیش رفت چاہتے ہیں۔خبر کے مطابق بدلتی ہوئی علاقائی اور عالمی مارکیٹ صورتحال کے تناظر میں یو اے ای اور چین پائیدار اقتصادی نمو، ترقیاتی شراکت اور طویل المدتی تعاون کے نئے راستے تلاش کرنے پر توجہ دے رہے ہیں۔اس سرکاری دورے کی اہمیت اس لیے بھی بڑھ گئی ہے کہ خطے میں موجودہ کشیدگی کے ماحول میں یو اے ای اپنی عالمی شراکت داریوں کو مزید متوازن اور مؤثر انداز میں آگے بڑھا رہا ہے جبکہ چین دنیا کی دوسری بڑی معیشت ہونے کے باعث امارات کے لیے ایک نہایت اہم تجارتی اور سرمایہ کاری شراکت دار سمجھا جاتا ہے۔رپورٹ کے مطابق یہ دورہ یو اے ای کے اس کردار کو بھی نمایاں کرتا ہے کہ وہ خود کو عالمی تجارت، سرمایہ کاری اور پائیدار اقتصادی ترقی کے ایک مرکزی مرکز کے طور پر مزید مستحکم کرنا چاہتا ہے۔شیخ خالد بن محمد بن زاید آل نہیان کے ہمراہ ایک اعلیٰ سطحی وفد بھی موجود ہے، جس میں شیخ زاید بن محمد بن زاید آل نہیان، خلدون خلیفہ المبارک، ڈاکٹر سلطان احمد الجابر، محمد حسن السویدی، ڈاکٹر ثانی بن احمد الزیودی، لانا زکی نسیبہ، سعید مبارک الہاجری، سیف سعید غباش اور مریم عید المہیّری شامل ہیں۔ اس سے ظاہر ہوتا ہے کہ دورہ صرف علامتی نوعیت کا نہیں بلکہ اس میں سرمایہ کاری، خارجہ تعلقات، انڈسٹری، تجارت اور اسٹریٹجک روابط کے متعدد پہلو بیک وقت شامل ہیں۔

تل ابیب:اسرائیل نے دعویٰ کیا ہے کہ جنوبی لبنان کے اہم شہر بنت جبیل کا مکمل محاصرہ کر لیا گیا ہے۔اسرائیلی فوج کے مطابق شہر کا مکمل کنٹرول چند دنوں میں حاصل کر لیا جائے گا، صیہونی فوج نے ایک ہفتے میں 100 سے زائد حزب اللہ اہلکار شہید کرنے کا دعویٰ کیا ہے۔عرب میڈیا مکے مطابق اسرائیلی 98 ویں ڈویژن نے بنت جبیل کا گھیرا مکمل کر کے زمینی حملہ شروع کر دیا، اسرائیلی فورسز نے شہر کے داخلی و خارجی راستے بند کر دیئے، کمک کا راستہ کاٹ دیا گیا۔حزب اللہ کی جانب سے راکٹ اور ڈرون حملوں کے ذریعے بھرپور مزاحمت جاری ہے، بنت جبیل اسرائیل سرحد سے صرف 5 کلومیٹر کے فاصلے پر واقع لبنان کا اہم سٹریٹجک شہر ہے۔

دبئی: عرب میڈیا کا کہنا ہے کہ امریکی فوج نے آبنائے ہرمز کی ناکہ بندی شروع کر دی۔عرب میڈیا کے مطابق امریکی فوج نے ایران کے سمندری راستوں کی ناکہ بندی شروع کر دی ہے۔امریکی سینٹ کام کے مطابق ناکہ بندی کا عارضی نفاذ جہازوں کی ایرانی پورٹ میں آمدورفت پر ہوگا، خلیج عرب اور خلیج عمان میں ایرانی پورٹس سے آنے جانے والے جہازوں پر بھی نفاذ ہوگا۔اس سے قبل امریکی صدر ڈونلڈ ٹرمپ نے آبنائے ہرمز کی ناکہ بندی کا اعلان کرتے ہوئے کہا تھا کہ اب ایران اپنا تیل نہیں بیچ سکے گا، آبنائے ہرمز کی ناکہ بندی کر رہے ہیں۔انہوں نے کہا تھا کہ ایران کی فوج تباہ کر دی اور نیوی سمندر میں ڈبو دی ہے، ایرانی بحریہ کے 158 بحری بیڑے بھی تباہ کر دیئے ہیں۔امریکی صدر ڈونلڈ ٹرمپ نے کہا تھا کہ ہمارے پاس روس اور سعودی عرب سے بھی زیادہ تیل ہے، ایران اس وقت بُری صورتحال میں ہے۔انہوں نے کہا تھا کہ یہ بات واضح ہے کہ ایران کے پاس ایٹمی صلاحیت نہیں ہوگی، ایران نے وعدہ کیا تھا کہ آبنائے ہرمز کھولے گا لیکن اس نے جھوٹ بولا۔

ویٹیکن سٹی:کیتھولک مسیحیوں کے مذہبی پیشوا پوپ لیو کا امریکا کے صدر ڈونلڈ ٹرمپ کی جانب سے تنقید کا نشانہ بنائے جانے پر ردعمل سامنے آگیا۔صدر ڈونلڈ ٹرمپ نے جنگ کے خلاف بیانات دینے پر کیتھولک مسیحیوں کے مذہبی پیشوا پوپ لیو کو شدید تنقید کا نشانہ بناتے ہوئے انہیں کمزور اور خطرناک شخصیت قرار دیا تھا۔سوشل میڈیا پر اپنے ایک بیان میں ڈونلڈ ٹرمپ نے کہا کہ میں پوپ لیو کا بڑا مداح نہیں ہوں، جرم کے معاملے میں پوپ لیو کمزور ہیں اور خارجہ پالیسی کے معاملے میں وہ خوفناک ہیں۔پوپ لیو نے ٹرمپ کے بیان پر ردعمل دیتے ہوئے کہا کہ وہ جنگ کے خلاف آواز اٹھاتے رہیں گے، چاہے اس حوالے سے امریکی صدر ڈونلڈ ٹرمپ کی جانب سے ان پر تنقید ہی کیوں نہ کی جائے۔خبر رساں ایجنسی کے مطابق پوپ لیو نے خصوصی طیارے میں الجزائر جاتے ہوئے صحافیوں سے گفتگو کرتے ہوئے کہا کہ میں ان کے ساتھ بحث میں نہیں پڑنا چاہتا، میں جنگ کے خلاف، امن کے فروغ، مکالمے اور ریاستوں کے درمیان کثیرالجہتی تعلقات کو آگے بڑھانے کے لیے بلند آواز میں بولتا رہوں گا۔ان کا کہنا تھا کہ بہت زیادہ معصوم لوگ مارے جا رہے ہیں اور میرا خیال ہے کہ کسی نہ کسی کو کھڑا ہو کر یہ کہنا ہوگا کہ اس سے بہتر راستہ بھی موجود ہے۔

تہران: اسپین نے ایران کے دارالحکومت تہران میں اپنا سفارت خانہ دوبارہ کھول دیا۔چند روز قبل سپین نے ایران میں اپنا سفارت خانہ دوبارہ کھولنے کا اعلان کیا تھا۔واضح رہے کہ سپین کے وزیرِ خارجہ جوز مانوئل الباریس نے صحافیوں سے گفتگو کرتے ہوئے کہا تھا کہ میں نے تہران میں اپنے سفیر کو ہدایت دی ہے کہ تہران جا کر اپنی ذمے داریاں سنبھالیں اور سفارت خانہ دوبارہ فعال کریں۔ان کا کہنا تھا کہ سپین ہر ممکن طریقے سے امن کی کوششوں میں شامل ہونا چاہتا ہے۔یاد رہے کہ ایرانی دارالحکومت تہران میں مسلسل امریکی اور اسرائیلی فضائی حملوں کے پیشِ نظر اسپین نے اپنے سفارت خانے کے عملے کو واپس بلا لیا تھا۔