بلاول کو لاہور سے جتوا کر وزیر اعظم بنوائیں گے، آصف زرداری

کوٹ لکھپت: سابق صدر آصف علی زرداری نے کہا ہے کہ عام انتخابات میں بلاول کو لاہور سے جتوا کر وزیر اعظم بنوائیں گے۔

کوٹ لکھپت میں حلقہ این اے 127 کے انتخابی دفتر کے افتتاح کے موقع پر منعقدہ جلسے سے آصف زرداری نے کارکنان سے مختصر گفتگو کی۔

اپنے مختصر خطاب میں انہوں نے کہا کہ ’ہم اپنے کارکنان کی خواہشات پر چلتے ہیں، کارکنوں اور پارٹی نے مجھ پر اعتماد کیا ہے جس کو ہمیشہ پورا کروں گا‘۔
آصف زرداری نے کہا کہ ’انشااللہ بلاول کو لاہور سے جتوائیں گے اور پھر اُسے وزیراعظم بنوائیں گے۔

سابق صدر آصف زرداری نے کہا کہ ’ہم چالیس سال سے سیاست کررہے ہیں مگر ابھی ہمارا سفر بہت لمبا ہے،میں نے جیل میں پودا لگا یاجو 7سال میں بڑا ہوا اور اس پودے کا پھل کھایا، لاہور کے تمام عہدیدار مجھ سے جیل میں ملنے آتے تھے۔

انہوں نے کہا کہ مجھے جیل میں رہنے کا شوق نہیں تھا مگر میں نے صرف کارکنوں کی خاطرجیل کاٹی اور ڈیل نہیں کی جس کی وجہ سے میری پارٹی کے کارکن آج بھی سر اٹھا کر چلتے ہیں۔