معلومات ملی ہیں کچھ شرپسند دہشتگردی کا منصوبہ بنا رہے ہیں، وزیر اطلاعات سندھ

کراچی: نگراں وزیر اطلاعات محمد احمد شاہ نے کہا ہے کہ ہمارے پاس معلومات ہیں کہ کچھ شرپسند دہشت گردی کا منصوبہ بنا رہے ہیں۔

سندھ اسمبلی بلڈنگ میں اپیکس کمیٹی کے اجلاس کے حوالے سے بریفنگ دیتے ہوئے نگران صوبائی وزیر اطلاعات محمد احمد شاہ نے کہا کہ آج اپیکس کمیٹی میں اعلی قیادت سمیت تمام ایجنسیز کے نمائندہ گان موجود تھے۔ اپیکس کمیٹی میں موبائل سروس بند کرنے کے حوالے سے کوئی معاملہ زیر بحث نہیں آیا۔ کسی کو بھی الیکشن کے دن قانون ہاتھ میں لینے نہیں دیں گے۔

وزیر اطلاعات محمد احمد شاہ نے مزید کہا کہ اسلحے کی نمائش پر زیرو ٹالرنس ہے۔ اسلحے کی نمائش پر گرفتار بھی کریں گے اور ایف آئی آر بھی کاٹیں گے۔ کراچی میں بھی بیلٹ پیپرز کل سے تقسیم ہونا شروع ہو جائیں گے۔ کراچی، مٹیاری، سانگھڑ، شکار پور حساس ضلع ہیں۔ اپیکس کمیٹی میں اطلاعات آئی ہیں کہ کچھ لوگ دہشت گردی کا پلان کر رہے ہیں۔ دہشت گردی کے کسی بھی واقعے سے نمٹنے کے لیے تیار ہیں۔ بلوچستان سے آگے تک کی سرحد بہت لمبی ہے جہاں سے دہشت گرد آ سکتے ہیں۔

انہوں نے کہا کہ ہر ڈویژن کے ہیڈ کوارٹر میں کنٹرول روم بنے گا۔ ڈائریکٹر انفارمیشن کنٹرول روم میں موجود رہیں گے۔ انفارمیشن ڈپارٹمنٹ کل سے الیکشن سیل فعال کر دے گا۔پورے سندھ کی خبریں الیکشن سیل سے ملیں گیں۔ پیرا میڈیکل اسٹاف ہر وقت موجود رہے گا۔ آرمی کی تعیناتی مکمل ہو چکی ہے۔ پولیس، رینجرز اور پھر آرمی ان کے درمیان رابطے ہوں گے، سختی سے ہدایت کی گئی ہے کہ واپسی میں بیلٹ پیپرز کی مکمل حفاظت کی جائے گی، جو بھی حساس ضلع ہیں وہاں ہمارا فوکس زیادہ ہو گا۔

احمد شاہ نے کہا کہ کچے کے آس پاس کے علاقوں میں عارضی پولنگ اسٹیشنز بنائے جا رہے ہیں۔ ڈسٹرکٹ ہیڈ کوارٹر میں بیلٹ پیپرز پہنچ چکے ہیں۔ کچے کا انٹیلیجنس آپریشن مکمل ہو چکا ہے۔ پاکستان کی مسلح افواج ،حکومت ،ایجنسیز سب ایک پیج پر ہیں۔صرف الیکشن کے دن کے لیے نہیں بلکہ اس کے بعد بھی ریڈ الرٹ رہے گا۔ امن کے ساتھ الیکشن ہوگا۔الیکشن کے بعد کوئی دشمن فائدہ نا اٹھائے تو اس کے لیے بھی الرٹ رہیں گے۔