معاشی استحکام کامیاب آئی ایم ایف معاہدے کی تکمیل کا نتیجہ ہے

اسلام آباد وفاقی وزیر برائے خزانہ و محصولات سینیٹر محمد اورنگزیب نے کہا ہے کہ موجودہ معاشی استحکام ایک کامیاب آئی ایم ایف اسٹینڈ بائی معاہدے کی تکمیل کا نتیجہ ہے، جس کا آغاز وزیر اعظم شہباز شریف نے کیا اور نگراں حکومت نے اسے کامیابی سے مکمل کیافنانس ڈویژن میں بارکلیز کے سربراہی میں آئے ہوئے سرمایہ کاروں کے ایک وفد سے گفتگو کرتے ہوئے وزیر خزانہ نے کہا کہ حکومت کی بنیادی توجہ اقتصادی ڈھانچے میں ضروری اصلاحات کو یقینی بنانا ہے جس میں توانائی، سرکاری ادارے، نجکاری، ٹیکس کا نظام اور حکومت کے سائز میں کمی شامل ہیں، اقتصادی ڈھانچے میں اصلاحات کے عمل کو جاری رکھیں گےانہوں نے کہا کہ ماضی میں پاکستان کو صرف ایک قسط وصول کرنے والا ملک سمجھا جاتا تھا لیکن اب وقت آگیا ہے کہ اس تاثر کو ختم کیا جائے اور آئی ایم ایف پروگرام کے تحت طے شدہ اہداف کو مستقل بنیادوں پر لاگو کیا جائے تاکہ پاکستان کی معاشی استحکام کو پائیدار بنایا جا سکے