گورنر پنجاب سردار سلیم حیدر خان کی پنجاب حکومت پر تنقید، عوامی مسائل کے حل کا مطالبہ

گورنر پنجاب سردار سلیم حیدر خان نے پنجاب حکومت پر شدید تنقید کرتے ہوئے کہا کہ صوبے میں کوئی ایسا اسپتال نہیں جہاں غریبوں کا فری علاج ہو سکے، جبکہ سندھ کے تمام اسپتالوں میں غریب مریضوں کا علاج مفت فراہم کیا جاتا ہے۔ اٹک میں عوامی اجتماع سے خطاب کرتے ہوئے انہوں نے کہا کہ ترقیاتی منصوبے پورے پنجاب میں ہونے چاہئیں، اور لاہور کو تمام ترقی کا مرکز نہیں بنایا جا سکتا۔ انہوں نے مطالبہ کیا کہ اٹک، چکوال، جہلم، راجن پور اور ڈی جی خان جیسے اضلاع کو بھی ترقی دی جائے، کیونکہ یہ تمام اضلاع بھی پنجاب کا حصہ ہیں۔

سلیم حیدر خان نے مزید کہا کہ پنجاب کے حکمران عوام کو ریلیف دینے کے بلند و بانگ دعوے کرتے ہیں، لیکن حقیقت میں عوام کی ضروریات پورا کرنے میں ناکام ہیں۔ ان کا کہنا تھا کہ کسی بھی حکومت کا سب سے بڑا فرض صحت اور تعلیم کی مفت سہولت فراہم کرنا ہوتا ہے۔ انہوں نے یہ بھی کہا کہ اگر وہ خاموش رہیں تو پنجاب میں اپوزیشن کا کوئی وجود نہیں ہے اور عوامی نمائندوں سے سوال کیا کہ اسپتالوں میں ڈاکٹر کیوں نہیں ہیں۔

گورنر پنجاب نے اس موقع پر یہ بھی کہا کہ بلاول بھٹو زرداری کو وزیر اعظم بنائیں گے اور اٹک کی مختلف یونین کونسلز سے مختلف برادریوں نے پیپلز پارٹی میں شمولیت کا اعلان کیا۔