چین: 88 سالہ خاتون نے 38 بچوں کی پرورش کرکے انسانیت کی اعلیٰ مثال قائم کر دی

چین میں 88 سالہ تانگ کیانگ کو اپنے 38 گود لیے بچوں کی پرورش اور زندگی بچانے پر نیشنل مورال ماڈل کے ایوارڈ کے لیے نامزد کیا گیا ہے، جو کہ چین میں عام افراد کے لیے سب سے اعلیٰ ترین ایوارڈ ہے۔

تانگ کیانگ نے 1980 اور 1990 کی دہائی کے دوران 38 ننھے بچوں کی زندگی بچائی جنہیں مختلف مقامات پر پھینک دیا گیا تھا۔ ان میں سے بعض بچے کچرے کے ڈبوں میں ملے، جبکہ کچھ ریلوے ٹریک کے قریب اور اسپتال کے باہر چھوڑ دیے گئے تھے۔ ان بچوں کی دیکھ بھال کرنے کا عمل 1982 میں اس وقت شروع ہوا جب 46 سال کی عمر میں تانگ کیانگ نے ایک بچی کو اسپتال کے باہر چھوڑا ہوا پایا اور اسے اپنے گھر لے آئی۔ اس بچی کا نام فینگ فینگ رکھا گیا۔

تانگ کیانگ نے اپنے شوہر کے اعتراضات کے باوجود بچوں کی دیکھ بھال جاری رکھی۔ ان کے شوہر کا خیال تھا کہ کم آمدنی کے باعث مزید بچوں کی پرورش مشکل ہوگی، مگر تانگ کیانگ نے بچوں کی زندگی بچانے کی اپنی کوششیں جاری رکھی۔ وہ اپنے اسپتال کی ریٹائرمنٹ کے بعد ملنے والی پنشن سے ان بچوں کے لیے دودھ اور کھانے کا انتظام کرتی تھیں۔

وقت کے ساتھ، ان بچوں کو گود لینے کے لیے ایسے خاندانوں کو منتخب کیا گیا جو ان کی دیکھ بھال کر سکیں۔ ان میں سے ایک بچہ، زینگ جگانگ، آج 27 سال کا ہو چکا ہے اور فائر فائٹر کے طور پر کام کرتا ہے۔ زینگ تانگ کیانگ کی 88 ویں سالگرہ منانے کے لیے ان کے گھر آیا اور کہا کہ اگر تانگ کیانگ نہ ہوتیں تو اس کی زندگی کچھ مختلف ہوتی۔

یہ خاتون اب چین میں ایک انسانیت کی مثال بن چکی ہیں، جنہوں نے 38 بچوں کی زندگی بچا کر ایک نہ صرف انسانیت کی خدمت کی بلکہ اپنے شوہر اور خاندان کی مخالفت کے باوجود اس نیک کام کو پایہ تکمیل تک پہنچایا۔ تانگ کیانگ کی کہانی چین کے معاشرتی اور اخلاقی کردار کی عکاسی کرتی ہے اور انہیں نیشنل مورال ماڈل کے ایوارڈ کے لیے نامزد کیا جانا ایک عظیم اعزاز ہے۔