ضلع کرم میں پاراچنار شاہراہ کی بندش سے خوراک اور ادویات کا بحران، احتجاجی دھرنے جاری

ضلع کرم میں پاراچنار مرکزی شاہراہ کی بندش کو 79 دن گزر چکے ہیں، جس کے نتیجے میں علاقے میں خوراک اور ادویات کا شدید بحران پیدا ہوگیا ہے۔ اسپتالوں میں مسلسل اموات کی خبریں آرہی ہیں اور مقامی لوگ فاقہ کشی کا شکار ہیں۔ گرینڈ امن جرگہ فریقین سے مذاکرات مکمل کرنے کے باوجود اب تک کسی حتمی فیصلے تک نہیں پہنچ سکا۔ اس صورتحال کے خلاف پاراچنار میں 8 دن سے احتجاجی دھرنا جاری ہے، جس میں اسلام آباد، لاہور، جھنگ اور مظفرآباد سمیت دیگر شہروں میں بھی دھرنے دیے جا رہے ہیں۔

کراچی میں بھی احتجاجی مظاہروں کا اثر پڑا ہے، جہاں مختلف مقامات پر ٹریفک کی روانی متاثر ہو رہی ہے۔ ایم اے جناح روڈ، نمائش چورنگی، ابو الحسن اصفہانی روڈ اور دیگر اہم سڑکوں پر ٹریفک بند کر دیا گیا ہے۔ ٹریفک پولیس نے متبادل راستوں کی ہدایت دی ہے تاکہ شہر کی سڑکوں پر ٹریفک کی روانی برقرار رکھی جا سکے۔