یورپی یونین میں نئے اسمارٹ فونز اور ڈیوائسز کے لیے یو ایس بی ‘سی’ چارجر لازمی قرار

یورپی یونین کے تمام 27 ممالک میں اب سے تمام نئے اسمارٹ فونز، ٹیبلیٹس، ڈیجیٹل کیمروں، ہیڈ فونز، اسپیکرز اور کی بورڈز کا چارجر ایک ہی قسم کا ہوگا۔ اس نئے قانون کے تحت، تمام مینوفیکچررز کو یہ پابندی ہوگی کہ وہ اپنی نئی ڈیوائسز کو یو ایس بی ‘سی’ کے چارجرز سے چارج کریں۔ اس تبدیلی سے صارفین کو اضافی چارجرز خریدنے کی ضرورت نہیں ہوگی، اور مختلف ڈیوائسز کے لیے ایک ہی چارجر استعمال کیا جا سکے گا۔

یورپی یونین نے 2022 میں ایک ہی چارجر کے قانون کو منظور کیا تھا، جس پر باضابطہ عملدرآمد 28 دسمبر 2024 سے شروع ہوگیا ہے۔ اس فیصلے سے صارفین کو سالانہ 208 ملین ڈالرز کی بچت ہونے کی توقع ہے، جبکہ ایک ہزار ٹن سالانہ فضلہ بھی کم ہو جائے گا، جس سے ماحولیاتی آلودگی میں کمی آئے گی۔ یہ اقدام ٹیکنالوجی کے شعبے میں یکسانیت لانے اور فضلہ کو کم کرنے کی سمت میں ایک اہم قدم ہے۔