کراچی کے گلستان جوہر کی فرنیچر مارکیٹ میں آگ، 30 سے زائد دکانیں جل گئیں

کراچی کے علاقے گلستان جوہر میں کامران چورنگی کے قریب فرنیچر مارکیٹ میں شدید آگ لگ گئی، جس سے بھاری مالیت کا فرنیچر جل کر خاکستر ہو گیا۔ فائر بریگیڈ حکام کے مطابق ابتدائی طور پر ایک فائر ٹینڈر روانہ کیا گیا تھا، لیکن آگ کی شدت اتنی زیادہ تھی کہ شعلے دور دور تک نظر آنے لگے۔

آگ کی شدت کو دیکھتے ہوئے مزید 6 فائر ٹینڈرز کو طلب کیا گیا، جن کی مدد سے کئی گھنٹوں کی محنت کے بعد آگ پر قابو پایا گیا۔ فائر آفیسر ظفر خان نے بتایا کہ اس آتشزدگی کے نتیجے میں 30 سے زائد دکانیں مکمل طور پر جل کر تباہ ہو گئیں۔ تاہم، خوش قسمتی سے کسی جانی نقصان کی اطلاع نہیں ملی۔

آگ لگنے کی اصل وجہ ابھی تک معلوم نہیں ہو سکی، اور تحقیقات جاری ہیں۔ اس واقعے نے مارکیٹ کے مالکان اور دکانداروں کو شدید مالی نقصان پہنچایا، تاہم فائر بریگیڈ کی بروقت کارروائی سے مزید تباہی کو روکا جا سکا۔