نیواورلینز میں ہجوم پر گاڑی چڑھانے کا واقعہ، 10 ہلاک، 30 زخمی

امریکی شہر نیواورلینز میں سال نو کی تقریبات کے دوران ایک خوفناک واقعہ پیش آیا، جہاں ایک کار سوار نے تیز رفتار گاڑی ہجوم پر چڑھا دی۔ حکومتی ذرائع کے مطابق یہ واقعہ نیواورلینز کی معروف بربن اسٹریٹ پر پیش آیا، جہاں لوگ سال نو کے جشن میں شریک تھے۔

حادثے کے نتیجے میں کم از کم 10 افراد ہلاک اور 30 زخمی ہوگئے۔ عینی شاہدین کے مطابق، گاڑی ہجوم پر چڑھانے کے بعد کار سوار نے گاڑی سے اتر کر فائرنگ شروع کردی، جس کے نتیجے میں دو پولیس اہلکار بھی زخمی ہو گئے۔

پولیس نے جوابی فائرنگ کی، جس میں کار سوار ہلاک ہو گیا۔ سوشل میڈیا پر اس حادثے کی ویڈیوز گردش کر رہی ہیں، جن میں زخمی اور ہلاک افراد کو دیکھا جا سکتا ہے، جبکہ ایک ویڈیو میں پولیس کو گاڑی پر فائرنگ کرتے ہوئے بھی دکھایا گیا ہے۔

یہ واقعہ نیواورلینز میں اس وقت پیش آیا جب لوگ سال نو کا جشن منانے کے لیے جمع تھے، جس نے شہر میں ہلچل مچادی۔