صائم ایوب علاج کے لیے لندن روانہ، پی سی بی کی جانب سے مکمل معاونت کا وعدہ

پاکستان کرکٹ ٹیم کے اوپننگ بیٹر صائم ایوب اپنے دائیں ٹخنے کی تکلیف کے علاج کے لیے کیپ ٹاؤن سے لندن روانہ ہوگئے ہیں۔ اس موقع پر اسسٹنٹ کوچ اظہر محمود بھی ان کے ہمراہ ہیں۔ پاکستان کرکٹ بورڈ کے چیئرمین محسن نقوی کی ہدایت پر انگلینڈ کے ماہر اسپورٹس آرتھوپیڈک ڈاکٹرز کل صائم ایوب کا چیک اپ کریں گے۔

محسن نقوی نے کہا کہ صائم ایوب پاکستان کرکٹ کا قیمتی اثاثہ ہیں اور ان کے علاج کے لیے تمام وسائل فراہم کیے جائیں گے۔ انہوں نے کہا کہ صائم ایوب کی صحت کی مکمل بحالی کے لیے دعا گو ہیں اور اس حوالے سے مسلسل ڈاکٹرز سے رابطے میں ہیں۔

اس سے قبل محسن نقوی اور صدرِ پاکستان آصف علی زرداری نے بھی صائم ایوب کو فون کرکے ان کی خیریت دریافت کی اور نیک خواہشات کا اظہار کیا۔

واضح رہے کہ صائم ایوب جنوبی افریقا کے خلاف دوسرے ٹیسٹ میچ کے دوران فیلڈنگ کرتے ہوئے دائیں ٹخنے میں فریکچر کا شکار ہو گئے تھے، جس کے باعث وہ کرکٹ سے چھ ہفتوں کے لیے باہر ہو گئے ہیں۔