میکسیکو میں نیتن یاہو کے مجسمے پر ہتھوڑی کا حملہ، فلسطینی حقوق کے حامی کی کارروائی

میکسیکو سٹی کے ایک میوزیم میں ایک نقاب پوش شخص نے اسرائیلی وزیراعظم نیتن یاہو کا مومی مجسمہ ہتھوڑی مار کر توڑ دیا، جس کی ویڈیو سوشل میڈیا پر وائرل ہوگئی۔ رپورٹ کے مطابق، نقاب پوش شخص نے پہلے نیتن یاہو کے مجسمے پر سرخ رنگ پھینکا، پھر ہتھوڑی سے اس کا چہرہ بگاڑا اور دھکا دے کر زمین پر گرا دیا۔ اس دوران، اس شخص نے فلسطینی پرچم بھی اٹھا رکھا تھا اور فلسطین، سوڈان، یمن اور پورٹوریکو کے حق میں نعرے لگائے۔

اسرائیلی میڈیا کے مطابق، یہ کارروائی فلسطینیوں کے حقوق کے لیے آواز اٹھانے والی میکسیکو کی غیرسرکاری تنظیم کے ایک کارکن نے کی۔ اس کارکن نے سوشل میڈیا پوسٹ میں کہا کہ مجسمہ فلسطینیوں کے خون سے نہیں چھپایا جا سکتا اور جنگی مجرموں کو شہر میں خوش آمدید نہیں کہا جا سکتا۔ ویڈیو پر سوشل میڈیا صارفین کے مختلف تبصرے آ رہے ہیں، جن میں اس کارروائی پر ردعمل ظاہر کیا جا رہا ہے۔