حکومت نجی شعبے کو مضبوط کرنے کی پالیسی پر عمل پیرا ہے: وزیرِاعظم

وزیرِاعظم شہباز شریف نے کہا ہے کہ حکومت ملک میں بے روزگاری کے خاتمے کے لیے نجی شعبے کو فروغ دینے کی پالیسی پر سرگرمی سے عمل کر رہی ہے۔آج اسلام آباد میں وزیرِاعظم یوتھ پروگرام کے حوالے سے منعقدہ اجلاس کی صدارت کرتے ہوئے انہوں نے کہا کہ “اڑان پاکستان” منصوبہ ملک بھر میں نئے روزگار کے مواقع پیدا کرے گا۔ انہوں نے کہا کہ نوجوانوں کو پیشہ ورانہ مہارتوں سے آراستہ کرنا روزگار کے مواقع بڑھانے کے لیے ضروری ہے۔وزیرِاعظم نے کہا کہ نیشنل ووکیشنل اینڈ ٹیکنیکل ٹریننگ کمیشن (NAVTTC) اور وزیرِاعظم یوتھ اسکل ڈویلپمنٹ پروگرام کو تکنیکی اور پیشہ ورانہ مہارتوں کے فروغ میں اپنا کردار ادا کرنا چاہیے۔ انہوں نے زور دیا کہ پاکستان کا مستقبل آئی ٹی سیکٹر کی ترقی سے وابستہ ہے۔انہوں نے ہدایت کی کہ دوست ممالک کی مارکیٹ کی ضروریات کے مطابق ایک منصوبہ تشکیل دیا جائے تاکہ نوجوانوں کو بیرونِ ملک روزگار کے مواقع فراہم کیے جا سکیں۔ وزیرِاعظم نے جعلی اور غیر لائسنس یافتہ کمپنیوں کے خلاف کاروائی کرنے کی بھی ہدایت کی جو بیرونِ ملک ملازمت فراہم کرنے کے دعوے کرتی ہیں۔وزیرِاعظم کو اجلاس میں بتایا گیا کہ “وزیرِاعظم ڈیجیٹل یوتھ حب” کے عنوان سے ایک پلیٹ فارم جلد قائم کیا جا رہا ہے، جو نوجوانوں کو ملازمتوں اور دیگر خدمات کے بارے میں آگاہ رکھے گا۔ وزیرِاعظم نے ہدایت کی کہ ڈیجیٹل یوتھ حب کو انگریزی کے ساتھ تمام مقامی زبانوں میں متعارف کروایا جائے تاکہ عوام کے لیے اسے قابلِ رسائی بنایا جا سکے۔اجلاس میں وزیرِاعظم یوتھ ایمپلائمنٹ پلان کی پیشرفت، بین الاقوامی مارکیٹ میں درکار مہارتوں سے لیس افرادی قوت کی تیاری کے اقدامات اور دیگر منصوبوں پر بریفنگ دی گئی۔