کے پی میں سکیورٹی فورسز کے انٹیلی جنس بیسڈ آپریشن‘22 خوارج ہلاک

راولپنڈی: خیبر پختونخوا کے ضلع خیبر میں سیکیورٹی فورسز نے مختلف انٹیلی جنس بیسڈ آپریشنز کے دوران 22 خوارج کو ہلاک جبکہ 18 کو زخمی کردیا ہے۔آئی ایس پی آر کے مطابق، یہ انٹیلی جنس بیسڈ آپریشنز 14 تاریخ سے خیبر ضلع کے تیرہ علاقے میں دہشتگردی کے متعدد واقعات کے ردعمل میں کیے گئے، جن میں معصوم شہریوں اور سیکیورٹی فورسز پر حملے شامل تھے اور کئی جانی نقصان ہوا تھا۔آئی ایس پی آر نے مزید کہا کہ یہ آپریشنز اس وقت تک جاری رہیں گے جب تک علاقے میں امن قائم نہیں ہو جاتا اور خوارج کا مکمل خاتمہ نہیں کر دیا جاتا۔ سیکیورٹی فورسز ملک سے دہشتگردی کے ناسور کو جڑ سے ختم کرنے کے لیے پرعزم ہیں۔
صدر آصف علی زرداری نے خیبر پختونخوا میں خوارج کے خلاف کامیاب کارروائیوں پر سیکیورٹی فورسز کو خراج تحسین پیش کیا ہے۔اپنے ایک بیان میں، انہوں نے خیبر ضلع میں انٹیلی جنس بیسڈ آپریشنز کے دوران فتنہ خوارج کے دہشتگردوں کو ہلاک کرنے پر فورسز کی بہادری کو سراہا۔انہوں نے کہا کہ 22 دہشتگردوں کی ہلاکت اور 18 کے زخمی ہونے کو سیکیورٹی فورسز کی بڑی کامیابی قرار دیا۔صدر نے دہشتگردوں کے مکمل خاتمے تک آپریشنز جاری رکھنے کے عزم کا اعادہ کیا اور وطن کے دفاع کے لیے اپنی غیر متزلزل وابستگی کا اظہار کیا۔
وزیر اعظم محمد شہباز شریف نے بھی خیبر ضلع میں 14 تاریخ سے خوارج کے خلاف انٹیلی جنس بیسڈ آپریشنز میں 22 دہشتگردوں کو ہلاک کرنے پر سیکیورٹی فورسز کو خراج تحسین پیش کیا۔ایک بیان میں وزیر اعظم نے کہا کہ پوری قوم دہشتگردی کے خلاف جنگ میں سیکیورٹی فورسز کے ساتھ کھڑی ہے۔وزیر اعظم نے دہشتگردی کے ناسور کے مکمل خاتمے تک جنگ جاری رکھنے کے حکومتی عزم کا اعادہ کیا۔