پاکستان نے پہلا مقامی الیکٹرو-آپٹیکل سیٹلائٹ لانچ کر دیا

اسلام آباد: پاکستان نے اپنا پہلا مقامی الیکٹرو-آپٹیکل (EO-1) سیٹلائٹ آج (جمعہ) کے روز چین کے جیئوچوان سیٹلائٹ لانچ سینٹر سے کامیابی کے ساتھ لانچ کر دیا۔وزیرِ اعظم محمد شہباز شریف نے سماجی رابطے کی ویب سائٹ ایکس پر اسے قوم کے لیے فخر کا لمحہ قرار دیا۔ انہوں نے کہا کہ الیکٹرو-آپٹیکل (EO-1) سیٹلائٹ زراعت میں فصلوں کی پیش گوئی سے لے کر شہری ترقی کی نگرانی تک ملک کی ترقی کے سفر میں ایک اہم پیش رفت ہے۔وزیرِ اعظم نے سائنسدانوں اور انجینئرز کی لگن اور ٹیم ورک کو سراہتے ہوئے انہیں مبارکباد دی۔ انہوں نے کہا کہ سپارکو کی قیادت میں یہ کامیابی خلائی سائنس اور ٹیکنالوجی میں ملک کی بڑھتی ہوئی صلاحیتوں کی عکاسی کرتی ہے۔پاک فوج کے شعبہ تعلقات عامہ (آئی ایس پی آر) نے پاکستان کے پہلے مقامی الیکٹرو-آپٹیکل (EO-1) سیٹلائٹ کے لانچ کو پاکستان کی خلائی ترقی کا ایک شاندار سنگِ میل قرار دیا۔آئی ایس پی آر کے مطابق، EO-1 سیٹلائٹ پاکستان کے مختلف شعبوں میں اہم فوائد فراہم کرے گا۔یہ سیٹلائٹ زراعت کے شعبے میں فصلوں کی نگرانی، آبپاشی کی ضروریات کا جائزہ لینے، پیداوار کی پیش گوئی، اور غذائی تحفظ کے اقدامات کو فروغ دینے کے لیے مددگار ہوگا۔شہری ترقی کی منصوبہ بندی کے لیے یہ سیٹلائٹ انفراسٹرکچر کی ترقی اور شہری پھیلاؤ کے انتظام میں مدد فراہم کرے گا۔ماحولیاتی نگرانی اور قدرتی آفات کے انتظام کے حوالے سے، سیٹلائٹ سیلاب، لینڈ سلائیڈز، زلزلے، جنگلات کی کٹائی اور زمین کے کٹاؤ پر بروقت معلومات فراہم کرے گا۔ مزید برآں، یہ معدنیات، تیل و گیس کے ذخائر، گلیشیئرز کے پگھلنے، اور آبی وسائل کی نگرانی میں بھی معاون ثابت ہوگا۔یہ کامیابی پاکستان کو جدید خلائی ٹیکنالوجی کی صلاحیتوں کے لحاظ سے ترقی کے نئے افق پر لے جانے اور قومی خلائی پالیسی کے اہداف کے مطابق آگے بڑھنے میں مدد فراہم کرے گی۔