پی ٹی آئی کے تحریری مطالبات پرحکومت نے جواب تیار‘9مئی واقعات پر جوڈیشل کمیشن کی تجویز مسترد

اسلام آباد:حکومتی ٹیم نے پی ٹی آئی کے تحریری مطالبات پر جواب تیار کر لیا ہے۔ ذرائع کے مطابق حکومتی مذاکراتی ٹیم نے تحریک انصاف کے مطالبات پر شق وار جواب ترتیب دیا ہے، جس میں 9 مئی کے واقعات پر جوڈیشل کمیشن بنانے کی تجویز کو مسترد کر دیا گیا ہے۔ جواب میں وضاحت کی گئی ہے کہ جوڈیشل کمیشن صرف ان معاملات پر تشکیل دیا جاتا ہے جو عدالت میں زیرِ بحث نہ ہوں۔ چونکہ 9 مئی کے مقدمات پہلے ہی عدالتوں میں زیرِ سماعت ہیں اور بعض ملزمان کو ملٹری کورٹس سے سزائیں بھی ہو چکی ہیں، اس لیے ان پر جوڈیشل کمیشن نہیں بنایا جا سکتا۔تحریری جواب میں مزید کہا گیا ہے کہ 26 نومبر کے لاپتہ افراد اور گرفتار شدگان کی تفصیلات فراہم کی جائیں۔ حکومت نے مؤقف اختیار کیا ہے کہ جب تک گرفتار افراد کے نام اور تفصیلات فراہم نہیں کی جاتیں، رہائی کے لیے کوئی عملی اقدام ممکن نہیں۔ تحریک انصاف کے دعوے کے مطابق مبینہ ہلاکتوں کی تفصیلات بھی فراہم کرنا ضروری ہے۔ذرائع کے مطابق حکومتی کمیٹی یہ تحریری جواب آئندہ چند دنوں میں اسپیکر قومی اسمبلی ایاز صادق کو پیش کرے گی۔ اسپیکر کے جواب موصول ہونے کے بعد مذاکرات کے چوتھے اجلاس کے انعقاد کا فیصلہ کیا جائے گا۔ یہ اجلاس مستقبل کی حکمت عملی طے کرنے اور موجودہ مسائل کے حل کی جانب پیش رفت کے لیے اہم ہوگا۔