عمران خان کے وکلاء کا بانی پی ٹی آئی کی جیل سہولیات پر اطمینان کا اظہار

اسلام آباد ہائی کورٹ (IHC) نے (آج) جمعہ کے روز پاکستان تحریک انصاف (پی ٹی آئی) کے بانی عمران خان کی درخواست نمٹاتے ہوئے اڈیالہ جیل انتظامیہ کو حکم دیا کہ وہ جیل کے ضوابط کے مطابق عمران خان کو سہولتیں فراہم کرے۔عدالت نے کہا کہ پی ٹی آئی کے بانی کے وکیل نے جیل میں فراہم کی جانے والی سہولتوں پر اطمینان کا اظہار کیا ہے۔چیف جسٹس عامر فاروق نے عمران خان کو جیل میں سہولتوں کے حوالے سے دائر درخواست پر تحریری حکم جاری کیا، جس میں ملاقاتوں، اپنے بیٹوں اور دیگر کے ساتھ ٹیلیفونک بات چیت کی سہولت شامل ہے۔عدالت نے کہا کہ اڈیالہ جیل کے سپرنٹنڈنٹ نے بتایا ہے کہ پی ٹی آئی کے بانی کا باقاعدگی سے طبی معائنہ کیا جا رہا ہے اور اگر کسی شکایت کی صورت میں وہ نجی ڈاکٹر سے بھی معائنہ کروا سکتے ہیں۔جیل حکام نے کہا کہ جیل کے قواعد کے مطابق یہاں بین الاقوامی فون کالز کی سہولت نہیں ہے، یہ سہولت صرف عدالتی حکم پر فراہم کی جاتی ہے۔جیل حکام نے مزید بتایا کہ پی ٹی آئی کے بانی کے وکلا اور خاندان کے ارکان سے ملاقاتیں ہر ہفتے منگل اور جمعرات کو منعقد کی جاتی ہیں، اور قیدی کو دو اخبارات فراہم کیے جا رہے ہیں جیسا کہ ضوابط میں درج ہے۔جیل انتظامیہ نے کہا کہ وہ ہمیشہ عدالت کے احکام کے مطابق پی ٹی آئی کے بانی کو جیل میں سہولتیں فراہم کرتی ہے۔عدالت نے کہا کہ چونکہ پی ٹی آئی کے بانی کے وکیل نے اپنے مؤکل کو فراہم کی جانے والی سہولتوں پر اطمینان کا اظہار کیا ہے، اس لیے مزید مداخلت کی ضرورت نہیں ہے۔عدالت نے جیل انتظامیہ کو عمران خان کو جیل میں سہولتیں فراہم کرنے کی یقین دہانی کراتے ہوئے کیس نمٹا دیا۔