لاہور ہائی کورٹ میں 10 ایڈیشنل ججز کی تعیناتی کیلئے جوڈیشل کمیشن کا اجلاس کل ہوگا

لاہور: لاہور ہائی کورٹ میں 10 ایڈیشنل ججز کی تعیناتی کے لیے چیف جسٹس آف پاکستان یحییٰ آفریدی کی زیر صدارت جوڈیشل کمیشن کا اجلاس کل سپریم کورٹ میں ہوگا۔لاہور ہائی کورٹ میں دس ایڈیشنل ججز کی تعیناتی کے معاملے پر جوڈیشل کمیشن کے اجلاس کی صدارت چیف جسٹس پاکستان یحییٰ آفریدی کریں گے جبکہ اجلاس سپریم کورٹ کے کمیٹی روم میں دوپہر دو بجے منعقد ہوگا۔ذرائع کے مطابق جوڈیشل کمیشن کو ایڈیشنل ججز کے لیے 49 نامزدگیاں موصول ہوئی ہیں جن میں چار ڈسٹرکٹ سیشن ججز اور 45 سینئر وکلا شامل ہیں۔اجلاس میں ڈسٹرکٹ سیشن جج قیصر نذیر بٹ، محمد اکمل خان، جزیلہ اسلم اور ابہر گل خان کے ناموں پر غور ہوگا۔اس کے علاوہ ایڈووکیٹ عدنان شجاع بٹ، ایان طارق بھٹہ، امبرین انور راجہ، اسد محمود عباسی، عاصمہ حامد اور بشریٰ قمر کے نام بھی زیر غور آئیں گے۔اجلاس میں اقبال احمد خان، سلطان محمود اور غلام سرور سمیت دیگر امیدواروں کے ناموں پر بھی فیصلہ کیا جائے گا۔