70 سال سے بھارتی افواج نے کشمیری بھائیوں پر مظالم ڈھائے ہوئے ہے: بلاول بھٹو

اسلام آباد:چیئرمین پیپلز پارٹی بلاول بھٹو زرداری نے کہا ہے کہ پاکستان کشمیر کے بغیر نامکمل ہے، بھارت کی جانب سے اپنے آئین کے آرٹیکل 370 کو منسوخ کرنے کی مذمت کرتے ہیں یہ کشمیری عوام کے ساتھ ایک سنگین ناانصافی ہے۔یوم یکجہتی کشمیر کے موقع پر اپنے پیغام میں انہوں نے عہد کیا کہ پیپلزپارٹی کشمیری عوام کے ساتھ اس وقت تک کھڑی رہے گی جب تک وہ ان کا حق خود ارادیت حاصل نہیں کر لیتے۔چیئرمین پی پی نے افسوس کا اظہار کرتے ہوئےکہ 70 سال سے زائد عرصے سے بھارتی افواج نے کشمیری بھائیوں پر مظالم ڈھائے ہوئے ہے، عالمی برادری بھارتی افواج کی مقبوضہ کشمیر میں انسانی حقوق کی سنگین خلاف ورزیوں کا نوٹس لے اوربھارت کو کشمیری عوام پر ظلم سے روکے۔پارٹی کے سیکرٹری جنرل نیئر حسین بخاری نے اپنے پیغام میں کہا کہ پیپلز پارٹی کشمیریوں کی پشتیبان ہے،تحریک جدوجہد آزادی کشمیر میں پیپلز پارٹی نے کشمیریوں کا سیاسی سفارتی محاز پر ساتھ دیا اور دیتی رہے گی۔انہوں نے کہا کہ آزادی کشمیر تک پیپلز پارٹی کشمیریوں کی پشت پر ہے، مسئلہ کشمیر پر قوم متحد ہے۔