وفاقی حکومت نے نیا پاکستان روایتی سرٹیفکیٹس پر منافع کی شرح میں نمایاں کمی کر دی

اسلام آباد: وفاقی حکومت نے مختلف کرنسیوں میں جاری نیا پاکستان روایتی سرٹیفکیٹس پر منافع کی شرح میں بڑی کمی کر دی ہے، جس کا اطلاق فوری طور پر ہوگا۔ اسٹیٹ بینک آف پاکستان اور وزارت خزانہ کے مطابق پاکستانی روپے میں 12 ماہ کی مدت کے نیا پاکستان سرٹیفکیٹس پر منافع کی شرح میں 850 بیسز پوائنٹس کی کمی کی گئی ہے، جس کے بعد یہ 21.50 فیصد سے کم ہو کر 13 فیصد پر آ گئی ہے۔ اسی طرح امریکی ڈالر میں 12 ماہ کے سرٹیفکیٹس پر منافع کی شرح 200 بیسز پوائنٹس کی کمی کے بعد 9 فیصد سے گھٹ کر 7 فیصد ہو گئی ہے، جبکہ برطانوی پاؤنڈز میں یہ شرح 75 بیسز پوائنٹس کی کمی کے بعد 8 فیصد سے کم ہو کر 7.25 فیصد کر دی گئی ہے۔ یورو میں بھی 12 ماہ کی مدت کے سرٹیفکیٹس پر منافع کی شرح 175 بیسز پوائنٹس کی کمی کے بعد 7 فیصد سے گھٹ کر 5.25 فیصد مقرر کر دی گئی ہے۔