سعودی عرب میں شدید سردی کی نئی لہر داخل، شمالی علاقوں میں برفباری کا امکان

ریاض: سعودی عرب میں شدید سردی کی نئی لہر داخل، سعودی محکمہ موسمیات نے شمالی علاقوں میں برفباری کا امکان ظاہر کر دیا۔ سعودی عرب کے شمالی اور وسطی علاقوں میں درجہ حرارت نقطہ انجماد سے نیچے گرنے کی توقع ہے، سردی کی اس لہر کو ماہرین موسمیات نے برد العجوز قرار دیا ہے، جو عام طور پر بہار سے پہلے آتی ہے۔سعودی محکمہ موسمیات کا کہنا ہے کہ بدھ تک شمالی اور شمال مشرقی علاقوں میں شدید سردی کی لہر رہے گی، اس لہر کے اثرات وسطی علاقوں میں بھی محسوس کئے جائیں گے۔ پیشگوئی کرتے ہوئے کہا گیا ہے کہ درجہ حرارت صبح کے وقت صفر ڈگری سے نیچے جا سکتا ہے جبکہ مملکت کے وسطی علاقوں میں 0 سے 4 ڈگری سینٹی گریڈ تک رہنے کا امکان ہے۔ اس کے علاوہ مدینہ، مکہ، تبوک اور مشرقی صوبے سمیت ریاض اور نجران میں تیز ہوائیں چلنے اور گرد و غبار کے طوفان کا بھی امکان ظاہر کیا گیاہے۔ماہرین کا کہنا ہے کہ شمالی علاقوں میں برفباری کا امکان بھی موجود ہے۔