گورنر کی ترجیحات صرف اپنے آقاؤں کو خوش کرنا ، صوبے کے مسائل سے کوئی سروکار نہیں: بیرسٹر سیف

پشاور: خیبرپختونخوا کے مشیر اطلاعات بیرسٹر محمد علی سیف نے کہاہے خیبر پختونخوا کے گورنر بیچارے کا ویسا بھی کوئی کام نہیں ہے صرف خط ہی لکھ سکتے ہیں۔ بیرسٹر سیف نے گورنر فیصل کریم کنڈی کی جانب سے وزیر اعظم اور صدر کو اسلام آباد انٹرنیشنل ائیرپورٹ کو بے نظیربھٹو کے نام منسوب کرنے کے خط پر رد عمل دیا اور کہا کہ گورنر کی ترجیحات صرف اپنے آقاؤں کو خوش کرنا ہیں، صوبے کے مسائل سے کوئی سروکار نہیں۔ بیرسٹر سیف کا کہنا تھا کہ گورنر ایک خط وفاق کو صوبے کے حقوق پر بھی لکھ لیں جس میں صوبے کے بقایا جات کی ادائیگی اور اس کے ساتھ سوتیلی ماں جیسے سلوک کے خاتمے کی استدعا کریں اور این ایف سی ایوارڈ میں پورا حصہ دینے کی درخواست کریں، بیرسٹر سیف نے کہا کہ گورنر ہاؤس کا کردار آج کل محض ایک ڈاک خانے جیسا ہے، جہاں ایک مسترد شدہ ڈاکیا بیٹھا ہے،گورنر علی امین کی طرح صوبے کی فلاح و بہبود کے لیے بھی کچھ کریں۔