حکومت سے ایوان صدر نے ایک سالہ کارکردگی رپورٹ مانگ لی‘صدر خطاب میں پیش کرینگے

اسلام آباد: حکومت سے ایوان صدر نے ایک سالہ کارکردگی رپورٹ مانگ لی ہے۔ نجی ٹی وی کے مطابق ایوان صدر نے صدر آصف علی زرداری کی جانب سے پارلیمنٹ کے مشترکہ اجلاس سے خطاب سے قبل حکومت سے ایک سالہ کارکردگی کی رپورٹ طلب کی ہے۔ ذرائع کا کہنا ہے کہ صدر آصف علی زرداری پارلیمنٹ کے مشترکہ اجلاس سے خطاب میں حکومت کی ایک سالہ کارکردگی کے اہم نکات کے ساتھ ساتھ اہم معاشی اقدامات کے نتائج کا ذکر بھی کریں گے۔ اپنے خطاب میں صدر مملکت کشمیر اور فلسطین سمیت اہم علاقائی و عالمی امور پر بھی اظہار خیال کریں گے، اپوزیشن کی جانب سے متوقع احتجاج کے پیش نظر ان کے خطاب کا دورانیہ بیس سے پچیس منٹ تک ہو گا۔ صدر مملکت کے خطاب کے ساتھ ہی دوسرے پارلیمانی سال کا آغاز ہو جائے گا، مشترکہ اجلاس دس مارچ کو بلانے کا فیصلہ کیا گیا ہے جس کی صدارت اسپیکر قومی اسمبلی کریں گے۔